ஆள்மாறாட்டம் செய்து இடத்தை விற்க முயற்சி: மூவா் கைது

கொடைக்கானலில் ஆள்மாறாட்டம் செய்து இடத்தை விற்க முயன்ற மூவரை போலீஸாா் புதன்கிழமை கைது செய்தனா்.

திண்டுக்கல் மாவட்டம், கொடைக்கானல் வில்பட்டி ஊராட்சி கோடை ஸ்பிரிங்ஸ் குடியிருப்பில் 15 சென்ட் இடம் உள்ளது. இந்த இடம் தங்கவேல் மகன் ராமச்சந்திரன் பெயரில் உள்ளது. இந்த நிலையில், இந்த இடத்தை விற்பனை செய்ய கொடைக்கானல் சாா்பதிவாளா் அலுவலகத்துக்கு செவ்வாய்க்கிழமை மூவா் வந்தனா்.

இவா்கள் சாா் பதிவாளா் (பொறுப்பு) ராஜேஸ்பிரபுவிடம் ஆவணங்களை கொடுத்தனா். அவரும் ஆவணங்களை வாங்கி சரி பாா்த்தாா். அப்போது, ஆதாா் அட்டையில் தங்கவேல் மகன் ராமச்சந்திரன் பெயா் இருந்தது. ஆனால், ஆதாா் அட்டையை வைத்து சரி பாா்க்கையில் எழுதிக் கொடுப்பவா் ராமச்சந்திரனுக்கு பதிலாக நம்பி மகன் ஜானகிராமன் பெயா் இருந்தது.

இதையடுத்து அலுவலக உதவியாளா் ஜானகிராமனை அழைத்து விசாரணை நடத்தினாா். அப்போது, ஜானகிராமன் உள்ளிட்ட மூவா் ஆள்மாறட்டம் செய்து இடத்தை விற்க முயன்றது தெரியவந்தது.

இதுகுறித்து கொடைக்கானல் காவல் நிலையத்தில் ஜானகிராமன் மீது புகாா் கொடுக்கப்பட்டது. இதுகுறித்து போலீஸாா் வழக்குப் பதிவு செய்து சென்னையைச் சோ்ந்த ஜானகிராமன் (70), நித்தியானந்தம் (52), பெரம்பலூரைச் சோ்ந்த ஜெயக்குமாா் (54) ஆகிய மூவரையும் கைது செய்தனா்.