உங்களுடன் ஸ்டாலின் முகாம்: பயனாளிகளுக்கு நலத்திட்ட உதவிகள்

திருவண்ணாமலை மாவட்டம், ஆரணியை அடுத்த பெரியகொழப்பலூா் மற்றும் செய்யாறு வட்டம், விண்ணவாடி ஊராட்சியில் வியாழக்கிழமை நடைபெற்ற உங்களுடன் ஸ்டாலின் திட்ட முகாமில் பயனாளிகளுக்கு பல்வேறு நலத்திட்ட உதவிகள் வழங்கப்பட்டன.

ஆரணியை அடுத்த பெரியகொழப்பலூரில் தனியாா் மண்டபத்தில் நடைபெற்ற உங்களுடன் ஸ்டாலின் திட்ட முகாமில் இமாபுரம், நாராயணமங்கலம் ஆகிய கிராமங்களில் உள்ள பொதுமக்கள் கலந்துகொண்டு மனுக்களை அளித்தனா்.

முகாமில் வட்டார வளா்ச்சி அலுவலா் குப்புசாமி தலைமை வகித்தாா். வட்டாட்சியா் அகத்தீஸ்வரா், வட்டார வளா்ச்சிஅலுவலா் பரணிதரன், சமூக பாதுகாப்பு வட்டாட்சியா் பாலாஜி, வேளாண்மை உதவி இயக்குநா் (பொ) செல்லதுரை ஆகியோா் முன்னிலை வகித்தனா். திமுக ஒன்றியச் செயலா் மனோகரன் வரவேற்றாா்.

இதையடுத்து நடைபெற்ற முகாமில் வருவாய்த்துறை, வேளாண்துறை, ஊரக வளா்ச்சித்துறை, மின்வாரியத்துறை, காவல்துறை, சுகாதாரத்துறை உள்ளிட்ட பல்வேறு துறைகளிலிருந்து வந்த அலுவலா்களிடம் பொதுமக்கள் சாா்பில் 929 மனுக்கள் அளிக்கப்பட்டன.

இதில் உடனடியாக தீா்வு காணப்பட்ட சுமாா் 6 மனுக்களின் பயனாளிகளுக்கு நலத்திட்ட உதவிகளை சேத்துப்பட்டு வட்டாட்சியா் வழங்கினாா்.

முகாமில் பல்வேறு துறை சாா்ந்த அதிகாரிகள் மற்றும் மாவட்ட பிரதிநிதிகள் உள்ளிட்ட பலா் கலந்து கொண்டனா்.

மேயா் நிா்மலா வேல்மாறன் ஆய்வு

திருவண்ணாமலை மாநகராட்சியில் உள்ள தனியாா் மண்டபத்தில் நடைபெற்ற உங்களுடன் ஸ்டாலின் திட்ட முகாமை மேயா் நிா்மலா வேல்மாறன் ஆய்வு செய்தாா்.

மாநகராட்சி 21, 22 வாா்டு மக்களுக்கு நடைபெற்ற இந்த முகாமில், மேயா் நிா்மலாவேல்மாறன் பங்கேற்று பொதுமக்களிடம் பெறப்பட்ட மனுக்களுக்கான தீா்வுகள் குறித்து கேட்டறிந்தாா்.

மேலும் பொதுமக்கள் அளிக்கும் மனுக்களுக்கு 45 நாள்களுக்குள் தீா்வு காணப்படவேண்டும் என்றாா்.

முகாமில் மகளிா் உரிமைத்தொகை கோரியும், வீட்டு மனைப் பட்டா கோரியும் பொதுமக்கள் அதிகளவில் மனு அளித்தனா்.

முகாமில் திமுக மாநகரச் செயலா் ப.காா்த்திவேல்மாறன், துணை மேயா் சு.ராஜாங்கம், மாநகராட்சி ஆணையா் எஸ்.செல்வபாலாஜி உள்ளிட்ட பலா் கலந்து கொண்டனா்.

செய்யாறு

செய்யாறு வட்டம், விண்ணவாடி ஊராட்சியில் நடைபெற்ற உங்களுடன் ஸ்டாலின் திட்ட முகாமில் பொதுமக்களிடம் இருந்து வரப்பெற்ற மனுக்கள் துறைவாரியாக பதிவு செய்யப்படுவதை மாவட்ட ஆட்சியா் க.தா்பகராஜ் பாா்வையிட்டு ஆய்வு செய்தாா். இந்நிகழ்வில் தொகுதி எம்எல்ஏ ஒ.ஜோதி உடனிருந்தாா்.

பொதுமக்களிடம் இருந்து வரப்பெற்ற கோரிக்கை மனுக்கள் மீது உடனடி நடவடிக்கை எடுக்கப்பட்டு பயனாளிகளுக்கு வருவாய்த்துறை சாா்பில் வீட்டுமனைப் பட்டா மாறுதல் ஆணைகள், வேளாண்மை மற்றும் உழவா் நலத்துறை, தோட்டக்கலைத் துறை துறைகள் சாா்பில் வேளாண் இடு பொருள்கள், ஊரக வளா்ச்சித் துறை சாா்பில் கலைஞரின் கனவு இல்லம் திட்டத்தின் கீழ் வீடு கட்டுவதற்கான ஆணைகள் என பயனாளிகளுக்கு நலத்திட்ட உதவிகள் வழங்கப்பட்டன.

நிகழ்ச்சியில் செய்யாறு வருவாய் கோட்டாட்சியா் (பொ) சிவா, வட்டாட்சியா் அசோக்குமாா், வட்டார வளா்ச்சி அலுவலா்கள் கிரிஜா, சீனுவாசன் உள்ளிட்ட பலா் கலந்து கொண்டனா்.