ஏப்ரல் மாதத்தில் சில்லறை பணவீக்கம் 6 ஆண்டுகளில் இல்லாத அளவுக்கு 3.16% ஆக குறைவு!

புது தில்லி: தானியங்கள், பழங்கள், காய்கறிகள், பருப்பு, இறைச்சி, மீன் மற்றும் முட்டை ஆகிய பொருட்களின் விலைகள் குறைந்ததால் ஏப்ரல் மாதத்தில் சில்லறை பணவீக்கம் கிட்டத்தட்ட ஆறு ஆண்டுகளில் இல்லாத அளவுக்கு 3.16 சதவிகிதமாகக் குறைந்துள்ளது.

நுகர்வோர் விலைக் குறியீட்டு எண் அடிப்படையிலான பணவீக்கம் மார்ச் மாதத்தில் 3.34 சதவிகிதமாகவும், ஏப்ரல் 2024ல் அது 4.83 சதவிகிதமாகவும் இருந்தது. இதுவே ஜூலை 2019ல் இது 3.15 சதவிகிதமாக இருந்தது.

மார்ச் 2025 உடன் ஒப்பிடும்போது ஏப்ரல் 2025ல் உணவுப் பணவீக்கத்தில் 91 புள்ளிகள் சரிந்துள்ளது. இதுவே ஏப்ரல் 2025ல் உணவுப் பணவீக்கமானது அக்டோபர் 2021க்குப் பிறகு இது மிகக் குறைவாக பதிவாகியுள்ளது.

உணவுப் பணவீக்கம் ஏப்ரல் மாதத்தில் 1.78 சதவிகிதமாக இருந்த நிலையில் அதன் முந்தைய மாதத்தில் இது 2.69 சதவிகிதமாகவும், அதன் முன்பு இது 8.7 சதவிகிதமாகவும் இருந்தது.

2025-26 நிதியாண்டிற்கான நுகர்வோர் விலை குறியீட்டு எண் பணவீக்கம் 4% இருக்கும் என்று மத்திய வங்கி கணித்துள்ளது. முதல் காலாண்டில் இது 3.6 சதவிகிதமும், இரண்டாவது காலாண்டில் அது 3.9 சதவிகிதமும், மூன்றாவது காலாண்டில் அது 3.8 சதவிகிதம் மற்றும் 4-வது காலாண்டு இது 4.4 சதவிகிதமாகும்.

2025 ஏப்ரல் மாதத்தில் பிரதான பணவீக்கம் மற்றும் உணவுப் பணவீக்கத்தில் ஏற்பட்ட குறிப்பிடத்தக்க சரிவுக்கு காய்கறிகள், பருப்பு வகைகள், பழங்கள், இறைச்சி மற்றும் மீன், தானியங்கள் ஆகியவற்றின் பணவீக்கம் குறைந்ததே இதற்கு முக்கிய காரணம் என்று திட்ட அமலாக்க அலுவலகம் தெரிவித்துள்ளது.

ஏப்ரல் மாதத்தில், கடுகு எண்ணெயின் பணவீக்கம் 19.6 சதவிகிதமாகவும், சுத்திகரிக்கப்பட்ட எண்ணெய் 23.75 சதவிகிதமாகவும், ஆப்பிள் 17 சதவிகிதமாகவும், வெங்காயம் 2.94 சதவிகிதமாகவும் இருந்தது.

2025ல் கிராமப்புற பணவீக்கம் ஏப்ரல் 2025ல் 2.92 சதவிகிதமாக இருந்த நிலையில் அதற்கு முந்தைய மாதத்தில் அது 3.25 சதவிகிதமாக இருந்தது.

நகர்ப்புற பணவீக்கம் மார்ச் 2025ல் 3.43 சதவிகிதத்திலிருந்து ஏப்ரல் மாதத்தில் 3.36 சதவிகிதமாக குறைந்தது.

தரவுகளின் அடிப்படையில் அதிகபட்ச பணவீக்கம் கேரளாவில் 5.94 சதவிகிதமாகவும், குறைந்தபட்ச பணவீக்கமாக தெலுங்கானாவில் 1.26 சதவிகிதமாகவும் பதிவாகியுள்ளது.

இதையும் படிக்க: டாலருக்கு நிகரான ரூபாயின் மதிப்பு 3 காசு உயர்ந்து ரூ85.33-ஆக முடிவு!