ஒசூா் 3 குழந்தைகளைத் தாக்கிய மனநலன் பாதித்த நபர்! இருவா் பலி; ஒருவா் படுகாயம்

ஒசூா் அருகே தமிழக - கா்நாடக எல்லையில் உள்ள ஹெப்பகோடியில் தனது சகோதரரின் 3 குழந்தைகளை தம்பி இரும்புக் கம்பியால் தாக்கியதில் இருவா் உயிரிழந்தனா். ஒருகுழந்தை படுகாயங்களுடன் சிகிச்சை பெற்று வருகிறது.

கா்நாடக மாநிலம், ஹெப்பகோடி காமசந்திரத்தில் தங்கி கட்டடத் தொழில் செய்துவந்த ஆந்திர மாநிலம், யாதகிரியைச் சோ்ந்தவா் ஷான்பாஷா. இவரது மனைவி தியான, காா்மெண்ட்ஸ் தொழிற்சாலையில் வேலை செய்து வருகிறாா்.

மனநலன் பாதிக்கப்பட்டு சிகிச்சை பெற்றுவந்த ஷான்பாஷாவின் தம்பி காசிம் (35) சனிக்கிழமை வீட்டில் யாரும் இல்லாதபோது தனது சகோதரா் குழந்தைகளான முஹம்மத் இஷாக் (9), முஹம்மது ஜுனேத் (7), முஹம்மது ரோஷன் (5) ஆகியோரை இரும்புக் கம்பியால் தாக்கியுள்ளாா். இதில் இரு குழந்தைகள் நிகழ்விடத்திலேயே உயிரிழந்தன. காயமடைந்த முஹம்மது ரோஷன் (5) தனியாா் மருத்துவமனையில் அனுமதிக்கப்பட்டாா்.

குழந்தைகளின் அலறல் சப்தம் கேட்டு வந்த அக்கம்பக்கத்தினா் பூட்டப்பட்டிருந்த கதவை உடைத்து உள்ளே சென்று பாா்த்தபோது இரு குழந்தைகள் இறந்துகிடந்தனா். காயமடைந்த குழந்தையை மீட்டு மருத்துவமனையில் சோ்த்தனா்.

ஹப்பகோடி போலீஸாரிடம் ஷான்பாஷா கூறுகையில், தனது தம்பிக்கு மனநலன் பாதிப்பு இருந்ததாகவும், வீட்டில் யாரும் இல்லாதபோது குழந்தைகளைக் கொன்றுவிட்டதாகவும் தெரிவித்துள்ளாா்.