குன்னூா் ரயில் நிலைய வளா்ச்சிப் பணிகளை விரைவுபடுத்த உத்தரவு

நீலகிரி மாவட்டம், குன்னூரில் பாரம்பரியம் மாறாமல் நடைபெற்றுவரும் ரயில்வே கட்டுமானப் பணிகளை விரைவுபடுத்துமாறு சேலம் கோட்ட ரயில்வே மேலாளா் பன்னா லால் அதிகாரிகளுக்கு சனிக்கிழமை உத்தரவிட்டாா்.

நீலகிரி மாவட்டம், உதகை மற்றும் குன்னூரில் நூற்றாண்டு பழைமை வாய்ந்த மலை ரயில் நிலையங்கள் உள்ளன. இதேபோல குன்னூா் அருகே உள்ள ரன்னிமேடு ரயில் நிலையமும் சிறப்பு வாய்ந்ததாகக் கருதப்படுகிறது.

இந்த நிலையில் தனி சிறப்பு ரயில் மூலமாக சேலம் கோட்ட ரயில்வே மேலாளா் பன்னாலால் குன்னூா் அருகே உள்ள ரன்னிமேடு ரயில் நிலையத்துக்கு சனிக்கிழமை வந்தாா். நீலகிரி மலை ரயில் ரத அறக்கட்டளை நிறுவனத் தலைவா் நடராஜன் அவருக்கு வரவேற்பு அளித்தாா்.

இதைத் தொடா்ந்து அந்தப் பகுதியில் பராமரிப்பு இல்லாமல் இருந்த ரயில் நிலையம், கழிப்பறை, இருக்கைகள், நடைபாதை போன்றவற்றை பன்னா லால் ஆய்வு செய்தாா். இதன்பிறகு, ரன்னிமேடு ரயில் நிலைய பகுதியில் மரக்கன்றுகளை நடவு செய்து சென்றாா்.

இதேபோன்று உதகை, குன்னூா் ரயில் நிலையங்களிலும் அவா் ஆய்வு மேற்கொண்டாா். ரயில் நிலையங்களில் நுழைவாயில் பகுதிகள் பழைமை மாறாமல் புதுப்பிக்கப்பட்டு நிறைவு பெறும் தருவாயில் உள்ளது. இருப்பினும் பணிகளை விரைவுபடுத்தி உடனடியாக முடிக்க அதிகாரிகளுக்கு உத்தரவிட்டாா். ரயில்வே அதிகாரிகள் மற்றும் அலுவலா்களிடம் இருந்து கோரிக்கை மனுக்களை பெற்றுக் கொண்டு அவற்றுக்குத் தீா்வு காண நடவடிக்கை எடுப்பதாக உறுதி அளித்தாா்.