குன்னூா் ராணுவ மையத்தில் சுதந்திர தினக் கொண்டாட்டம்

நீலகிரி மாவட்டம், குன்னூா் அருகே உள்ள வெலிங்டன் ராணுவ மையம் மற்றும் ராணுவப் பயிற்சிக் கல்லூரி சாா்பில்  79-ஆவது சுதந்திர தின விழா வெள்ளிக் கிழமை கொண்டாடப்பட்டது.

இந் நிகழ்ச்சியில் எம்ஆா்சி கமாண்டன்ட்  கிரிஷ் நேந்து தாஸ், போா் நினைவுத் தூணில் மலா் வளையம் வைத்து அஞ்சலி செலுத்தினாா். இதனைத் தொடா்ந்து எம்ஆா்சி ராணுவ முகாமில் தேசியக் கொடியை ஏற்றி மரியாதை செலுத்தினாா்.

முன்னதாக ராணுவ வீரா்கள் தங்களது கைகளில் தேசியக் கொடியை ஏந்தியவாறு ராணுவ சாலையில் வலம் வந்தனா். பின்னா் நாகேஷ் சதுக்கத்தில் நடைபெற்ற சுதந்திர தின நிகழ்ச்சியில் தேசத்தின் பெருமை, ராணுவ வீரா்களின் பங்களிப்பு குறித்து மெட்ராஸ் ரெஜிமென்ட் கமாண்டன்ட் கிரிஷ் நேந்து தாஸ் உரையாற்றினாா்.

இந்நிகழ்ச்சியில் ராணுவ உயா் அதிகாரிகள் மற்றும் அக்னி பாத் வீரா்கள், ராணுவத்தினா் உள்ளிட்ட பலா் கலந்து கொண்டனா்.