கோடியக்கரை வன உயிரின சரணாலயத்தில் தேசிய மாணவா் படையினா் சனிக்கிழமை கல்வி பட்டறிவுப் பயணம் மேற்கொண்டனா்.
தஞ்சாவூா் பெரியாா் மணியம்மை அறிவியல் மற்றும் தொழில்நுட்ப நிறுவனத்துடன் நீடாமங்கலம் நீலன் பள்ளி இணைந்து வேவ்ஸ் & வெட் லேண்ட் என்ற கல்விப் பயணத்தை தொடங்கியுள்ளன.
இப்பயணத்தில் பெரியாா் மணியம்மை பல்கலைக் கழகத்தின் ஆற்றல் மற்றும் சுற்றுச்சூழல் மையத்துடன் இணைந்து தேசிய மாணவா் படை மாணவா்களும் நீலன் பள்ளியின் இயற்கை சங்க மாணவா்களும் பங்கேற்றுள்ளனா் .
கோடியக்கரை வனவிலங்கு சரணாலயம், அதைச் சுற்றியுள்ள சதுப்பு நில பகுதிகளைப் பாா்வையிட்டு அங்கு பாதுகாக்கப்பட வேண்டிய உயிரினங்களான வெளிமான், புள்ளிமான், பறவைகள் உள்ளிட்டவை குறித்து கற்றறிந்தனா்.
சதுப்பு நிலம் குறித்த முக்கியத்துவங்களையும்,அவை சுற்றுச்சூழலுக்கும், நீா் ஆதாரங்களுக்கும் ஏற்படுத்தும் நல் விளைவுகளையும் வெளிநாட்டு வலசை பறவைகளுக்கும் ஏற்படுத்தக் கூடிய நன்மைகளையும் கற்றறிந்தனா்.
கோடியக்கரை கடற்கரைப் பகுதியில் குப்பைகளைச் சேகரித்து, மாசுபடுதலுக்கு எதிரான விழிப்புணா்வை ஏற்படுத்தினா். இங்கு சேகரித்த சுமாா் 150 கிலோ எடையிலான குப்பைகளை குப்பை கிடங்கில் ஒப்படைத்தனா்.
நீடாமங்கலம் நீலன் பள்ளி செயலாளா் சுரேன் அசோகன், பெரியாா் மணியம்மை நிகா்நிலை பல்கலைக் கழக ஆற்றல் மற்றும் சுற்றுச்சூழல் மைய இயக்குநா் கீா்த்திவாசன் தாமோதரன்,
தேசிய மாணவா் படையின் பொறுப்பாளா் ஆா்.காா்த்திக், பள்ளி அலுவலக உதவியாளா் பிரியா உள்ளிட்டோா் பங்கேற்றனா்.
