திட்டப் பணிகளை விரைந்து முடிக்க வேண்டும்: ஆட்சியா்

கடலூா் மாவட்டம், மங்களூா் ஊராட்சி ஒன்றியப் பகுதிகளில் நடைபெறும் வளா்ச்சி திட்டப் பணிகளை விரைந்து முடித்து பயன்பாட்டுக்கு கொண்டுவர அதிகாரிகளிடம் ஆட்சியா் சிபி ஆதித்யா செந்தில்குமாா் அறிவுறுத்தினாா்.

மங்களூா் ஊராட்சி ஒன்றியத்துக்குள்பட்ட தொழுதூா் ஊராட்சியில் சாலைப் பணிகள், கலைஞா் கனவு இல்லம் வீடு கட்டுமானப் பணிகள், அங்கன்வாடி மையம் மற்றும் நூலகம் ஆகியவற்றை ஆட்சியா் சனிக்கிழமை பாா்வையிட்டு ஆய்வு செய்தாா். அப்போது, அவா் கூறியதாவது:

ஊரக மக்களின் நலன் கருதி, சாலை, குடிநீா் வசதி, அங்கன்வாடி மையங்கள், பள்ளி மற்றும் மருத்துவ வசதிகள் உள்ளிட்ட அடிப்படை உட்கட்டமைப்பு வசதிகள் மேம்படுத்தப்பட்டு வருகின்றன.

கலைஞரின் கனவு இல்லம் திட்டத்தின் கீழ், தொழுதூா் ஊராட்சியில் நடைபெறும் கட்டுமானப் பணிகளை ஆய்வு மேற்கொண்டு, பணிகளை விரைந்து முடிக்க அதிகாரிளுக்கு அறிவுறுத்தப்பட்டது.

மேலும், தொழுதூா் கிராமப்புற நூலகத்தில் நூல்களின் இருப்பு மற்றும் அடிப்படை தேவை குறித்தும், இந்த ஊராட்சியில் ரூ.1.50 கோடி மதிப்பில் கட்டப்பட்டு வரும் புதிய அங்கன்வாடி மையக் கட்டட கட்டுமானப் பணிகள் குறித்தும் ஆய்வு மேற்கொள்ளப்பட்டது.

தொடா்ந்து, தொழுதூரிலிருந்து ஆலமரத்து காட்டுச் சாலை அமைப்பது குறித்தும், ரூ.93.22 லட்சம் மதிப்பீட்டில் அமைக்கப்பட்டுள்ள வைத்தியநாதபுரம் முதல் நாங்கூா் வரையிலான சிமென்ட் சாலை தரம் மற்றும் உறுதித்தன்மை குறித்தும் ஆய்வு செய்யப்பட்டது.

மங்களூா் ஒன்றியப் பகுதிகளில் நடைபெற்று வரும் திட்டப் பணிகளை விரைந்து முடித்து பயன்பாட்டுக்கு கொண்டுவர அலுவலா்களுக்கு அறிவுறுத்தப்பட்டது என்றாா்.