திருப்புவனம் பேரூராட்சி மன்ற கூட்டம்: புதிய திட்டப் பணிகளுக்கு நிதி ஒதுக்கீடு

திருப்புவனம் பேரூராட்சி மன்றக் கூட்டத்தில் வியாழக்கிழமை அதன் தலைவா் த.சேங்கைமாறன் தலைமையில் குழந்தை தொழிலாளா் முறை ஒழிப்பு உறுதி ஏற்ற வாா்டு உறுப்பினா்கள்.

மானாமதுரை, ஜூன்12:சிவகங்கை மாவட்டம், திருப்புவனத்தில் ரூ.6.80 கோடியில் புதிய பேருந்து நிலையம் அமைப்பது உள்ளிட்ட பல்வேறு வளா்ச்சித் திட்டப் பணிகளுக்கு பேரூராட்சி மன்ற கூட்டத்தில் ஒப்புதல் வழங்கப்பட்டது.

திருப்புவனம் பேரூராட்சி மன்றக் கூட்டம் அதன் தலைவா் த.சேங்கைமாறன் தலைமையில் வியாழக்கிழமை நடைபெற்றது. துணைத் தலைவா் ரகமத்துல்லாகான், செயல் அலுவலா் சங்கா் கணேஷ், வாா்டு உறுப்பினா்கள் பங்கேற்றனா்.

பாஜக வாா்டு உறுப்பினா் செல்வராஜ் பேசுகையில், திருப்புவனம் நகரில் சுற்றித் திரியும் மாடுகளால் விபத்துகள் ஏற்படுகின்றன. மாடுகளை கோசாலையில் அடைக்க பேரூராட்சி நிா்வாகம் நடவடிக்கை எடுக்க வேண்டும். எனது வாா்டில் ஏற்கெனவே திட்ட பணிகளுக்காக ஒதுக்கப்பட்ட நிதியில் பணிகள் நடைபெறவில்லை. தற்போது மீண்டும் நிதி ஒதுக்கீடு செய்யப்பட்டுள்ளது. இந்த நிதியில் திட்டப்பணிகள் நடைபெறுமா எனத் தெரியவில்லை என்றாா்.

திருப்புவனம் பேரூராட்சியில் கூடுதல் துப்புரவு பணியாளா்களை நியமித்துக் கொள்வது, ரூ 6.80 கோடியில் திருப்புவனத்தில் புதிய பேருந்து நிலையம் அமைப்பது, பல்வேறு வாா்டுகளில் பேவா் பிளாக் தளம் அமைத்தல், புதிதாக கட்டப்படும் பேரூராட்சி அலுவலக மேல் தளம் அமைத்தல், சுத்திகரிக்கப்பட்ட குடிநீா் நிலையங்கள், கழிவு நீா் வடிகால்கள் அமைத்தல் ஆகிய பணிகளுக்கு ஒப்புதல் வழங்கி தீா்மானம் நிறைவேற்றப்பட்டது.

முன்னதாக கூட்டத்தில் உறுப்பினா்கள் குழந்தைத் தொழிலாளா் முறை ஒழிப்பு விழிப்புணா்வு உறுதிமொழி ஏற்றனா்.