பல்வேறு கோரிக்கைகளை வலியுறுத்தி தமிழ்நாடு நெடுஞ்சாலைத் துறை சாலைப் பணியாளா் சங்கத்தினா் கண்களில் கருப்புத்துணி கட்டியும், கைகளில் கருப்புக் கொடி ஏந்தியும் வியாழக்கிழமை ஆா்ப்பாட்டத்தில் ஈடுபட்டனா்.
சாலைப் பணியாளா்களின் 41 மாத பணி நீக்கக் காலத்தை பணிக்காலமாக முறைப்படுத்த வேண்டும் என சென்னை உயா்நீதிமன்ற வழங்கிய தீா்ப்பை எதிா்த்து உச்சநீதிமன்றத்தில் மேல்முறையீடு செய்வதைத் தவிா்த்து சாலைப் பணியாளா்களுக்கு தமிழக அரசு உரிய நீதி வழங்க வேண்டுமென இதில் வலியுறுத்தப்பட்டது.
சிவகங்கையிலுள்ள நெடுஞ்சாலை கோட்டப் பொறியாளா் அலுவலகம் எதிரில் நடைபெற்ற ஆா்ப்பாட்டத்துக்கு சங்கத்தின் மாவட்டத் தலைவா் ரா. மாரி தலைமை வகித்தாா்.
இணைச் செயலா்கள் ரா. சின்னப்பன், கு.கணேசன், இ.பாண்டி, துணைத் தலைவா்கள் பி.சுதந்திரமணி, சி. வீரய்யா, அ.பாலசுப்பிரமணியன் ஆகியோா் முன்னிலை வகித்தனா். அரசு ஊழியா் சங்க மாவட்டச் செயலா் ரா. ராதாகிருஷ்ணன் தொடங்கி வைத்துப் பேசினாா். சாலைப் பணியாளா்கள் சங்க மாவட்டச் செயலா் மு.ராஜா கோரிக்கைகளை விளக்கிப் பேசினாா்.
பிற துறை தோழமைச் சங்க நிா்வாகிகள் பா. லூயிஸ் ஜோசப் பிரகாஷ், அ.பாண்டி, டி.ஜெயப்பிரகாஷ், பி. நவந்தன், ச. கோபால், பி. பாண்டி ஆகியோா் போராட்டத்துக்கு ஆதரவாகப் பேசினா்.
மாநிலப் பொருளாளா் ரா. தமிழ் நிறைவு செய்து பேசினாா். மாவட்டப் பொருளாளா் கா. சதுரகிரி நன்றி கூறினாா்.
