மன்னாா்குடியில் நடைபெற்ற நண்பரின் திருமணத்தில் பங்கேற்க திருப்பூரில் இருந்து வந்தவா், ஆற்றில் மூழ்கி புதன்கிழமை உயிரிழந்தாா்.
மன்னாா்குடியைச் சோ்ந்த காா்த்திகேயன் என்பவா் திருப்பூரில் உள்ள பனியன் நிறுவனத்தில் வேலை பாா்த்து வருகிறாா். அவருடன் திருப்பூா் குத்தூஸ்புரம் காசி விஸ்வநாதன் மகன் ராஜ் ( எ ) பிரபாகரன் (35). வேலை பாா்த்து வந்தாா்.
காா்த்திகேயனுக்கு புதன்கிழமை மன்னாா்குடியில் திருமணம் நடைபெற்றது. இதில் பங்கேற்க திருப்பூரிலிருந்து பிரபாகரன் தன்னுடன் பணியாற்றும் ராஜா, செல்வம், சக்திவேல் ஆகியோரை அழைத்துக்கொண்டு மன்னாா்குடி வந்தாா்.
திருமணம் முடிந்தவுடன் மன்னாா்குடி மேலப்பாலம் பாமணி ஆற்றில் நீா்த் தேக்கத்தில் நான்கு பேரும் குளித்துள்ளனா். பின்னா், மூன்று போ் கரைக்குத் திரும்பிய நிலையில், பிரபாகரன் மட்டும் குளித்துக்கொண்டிருந்தபோது திடீரென நீரில் மூழ்கினாா். இதைப் பாா்த்த மற்ற மூவரும் உதவி கேட்டு சத்தமிட்டுள்ளனா்.
அந்தப் பகுதியிலிருந்து சிலா் ஆற்றில் இறங்கி தேடிப் பாா்த்தும் பிரபாகரனை கண்டு பிடிக்க முடியாத நிலையில், தீயணைப்பு நிலையத்துக்கு தகவல் அளிக்கப்பட்டு, தீயணைப்பு வீரா்கள் வந்து சுமாா் 1 மணி நேரம் ஆற்றில் இறங்கி தேடி, பிரபாகரனின் சடலத்தை மீட்டனா்.
இதுகுறித்து மன்னாா்குடி போலீஸாா் விசாரிக்கின்றனா். உயிரிழந்த பிரபாகரனுக்கு மனைவி, ஒரு பெண் குழந்தை உள்ளது.
