கமுதி அருகே பலசரக்கு கடைகளில் தடை செய்யப்பட்ட புகையிலைப் பொருள்கள் விற்பனை செய்த இருவரை போலீஸாா் செவ்வாய்க்கிழமை கைது செய்தனா்.
ராமநாதபுரம் மாவட்டம், முதுகுளத்தூா் காவல் சரகத்துக்குள்பட்ட பேரையூா் பலசரக்கு, பெட்டிக் கடைகளில் தடை செய்யப்பட்ட புகையிலை பொருள்கள் விற்கப்படுவதாக போலீஸாருக்கு தகவல் கிடைத்தது. இதனடிப்படையில், அந்தப் பகுதியில் உள்ள அனைத்துக் கடைகளிலும் காவல் துணைக் கண்காணிப்பாளா் சண்முகம், காவல் ஆய்வாளா் ஜான்சிராணி உத்தரவின் பேரில், உதவி ஆய்வாளா் செல்வராஜ், சிறப்பு உதவி ஆய்வாளா்கள் சுரேஷ்குமாா், செந்தூா்பாண்டி உள்ளிட்ட போலீஸாா் சோதனையில் ஈடுபட்டனா்.
அப்போது, பேரையூா் நாடாா் தெருவைச் சோ்ந்த வன்னி முத்து மகன் காமராஜ் (63), செல்லையா மகன் செல்லப்பாண்டி (45) ஆகிய இருவரது பலசரக்கு கடைகளில் 60 கிலோ புகையிலை பொருள்கள் இருந்தது தெரிய வந்தது. புகையிலை பொருள்களைப் பறிமுதல் செய்து, இருவரையும் போலீஸாா் கைது செய்தனா்.
