பலத்த மழை எச்சரிக்கை: அனைத்து மாவட்டங்களிலும் முன்னெச்சரிக்கை நடவடிக்கைகள்! அமைச்சா் கே.கே.எஸ்.எஸ்.ஆா்.ஆர்

பலத்த மழை எச்சரிக்கையைத் தொடா்ந்து அனைத்து மாவட்டங்களிலும் தேவையான அனைத்து முன்னெச்சரிக்கை நடவடிக்கைகளும் பேரிடா் மேலாண்மை துறை சாா்பில் எடுக்கப்பட்டு வருவதாக அமைச்சா் கே.கே.எஸ்.எஸ்.ஆா். ராமச்சந்திரன் தெரிவித்தாா்.

விருதுநகா் மாவட்டம், ராஜபாளையம் நகராட்சியில் ரூ.2.90 கோடியில் புதுப்பிக்கப்பட்ட காந்தி நூற்றாண்டு பேருந்து நிலைய திறப்பு விழா வியாழக்கிழமை நடைபெற்றது. ராஜபாளையம்- மதுரை சாலையில் உள்ள பேருந்து நிலைய வளாகத்தில் நடைபெற்ற இந்த நிகழ்வுக்கு மாவட்ட ஆட்சியா் வீ.ப. ஜெயசீலன் தலைமை வகித்தாா்.

தென்காசி தொகுதி மக்களவை உறுப்பினா் ராணி ஸ்ரீகுமாா், ராஜபாளையம் சட்டப் பேரவை உறுப்பினா் தங்கப்பாண்டியன், ராஜபாளையம் நகா் மன்றத் தலைவா் ஏ.ஏ.எஸ். பவித்ரா ஷ்யாம் ஆகியோா் முன்னிலை வகித்தனா். தமிழக முதல்வா் மு.க. ஸ்டாலின் காணொலி மூலம் பேருந்து நிலையத்தை திறந்து வைத்தாா்.

பிறகு இங்கு நடைபெற்ற நிகழ்வில், வருவாய், பேரிடா் மேலாண்மைத் துறை அமைச்சா் கே.கே.எஸ்.எஸ்.ஆா். ராமச்சந்திரன் குத்துவிளக்கேற்றினாா். பேருந்து நிலையத்தில் முதல் பேருந்து சேவையையும் அவா் தொடங்கி வைத்தாா்.

அப்போது அவா் செய்தியாளா்களிடம் கூறியதாவது; தென்மேற்கு பருவ மழையை எதிா்கொள்ள முதல்வா் மு.க. ஸ்டாலின் முன்னெச்சரிக்கை நடவடிக்கைகளை எடுக்க அறிவுறுத்தி உள்ளாா். தற்போது பல்வேறு மாவட்டங்களுக்கு பலத்த மழைக்கான சிவப்பு எச்சரிக்கை விடுக்கப்பட்டுள்ளது. அனைத்து மாவட்டங்களிலும் தேவையான அனைத்து முன்னெச்சரிக்கை நடவடிக்கைகளும் பேரிடா் மேலாண்மை துறை சாா்பில் எடுக்கப்பட்டு வருகின்றன என்றாா் அவா்.

நிகழ்வில், தமிழ்நாடு சீா்மரபினா் நல வாரியத் துணைத் தலைவா் ராசா அருண்மொழி, ராஜபாளையம் தெற்கு நகரச் செயலா் ராமமூா்த்தி, மாவட்ட மகளிரணி அமைப்பாளா் சுமதி ஆகியோா் கலந்து கொண்டனா்.

ராஜபாளையம் பேருந்து நிலையத்தில் பயணிகள் காத்திருப்பு அறை, 23 கடைகள், தாய்மாா்கள் பாலூட்டும் அறை, 2 உணவகங்கள், 7 பேருந்துகளை நிறுத்தும் வசதி உள்ளிட்ட பல்வேறு அடிப்படை வசதிகள் செய்யப்பட்டிருப்பது குறிப்பிடத்தக்கது.