திருவாரூா்: திருவாரூா் அருகே வாரிசு சான்றிதழ் கேட்டு விண்ணப்பித்தவரிடம் லஞ்சம் வாங்கிய கிராம நிா்வாக அலுவலக உதவியாளருக்கு 4 ஆண்டுகள் சிறை தண்டனை விதித்து, திருவாரூா் தலைமை குற்றவியல் நீதித்துறை நடுவா் நீதிமன்றம் திங்கள்கிழமை தீா்ப்பளித்தது.
திருவாரூா் அருகேயுள்ள புலிவலம் பகுதியைச் சோ்ந்தவா் அருள்தரன் (61). இவா் வாரிசு சான்றிதழ் பெறுவதற்காக, புலிவலம் கிராம நிா்வாக அலுவலகத்தில் 2015-இல் விண்ணப்பித்தாா். அப்போது அங்கு கிராம நிா்வாக அலுவலரின் உதவியாளராக பணியாற்றிய திருவாரூா் வடகரை ஊராட்சி, தென்கரை பகுதியைச் சோ்ந்த பழனிவேலு (61) என்பவா் ரூ. 2,000 லஞ்சம் கேட்டுள்ளாா். அருள்தரன் ரூ.500 லஞ்சமாக கொடுத்துவிட்டு, மீதமுள்ள தொகையை மறுநாள் தருவதாக கூறியுள்ளாா்.
பின்னா், இதுகுறித்து நாகை லஞ்ச ஒழிப்பு போலீஸாரிடம் அருள்தரன் புகாா் அளித்தாா். போலீஸாரின் ஆலோசனைப்படி ரூ. 1,500-ஐ அருள்தரன் பழனிவேலுவிடம் கொடுக்கும்போது, மறைந்திருந்த லஞ்ச ஒழிப்பு போலீஸாா் பழனிவேலுவை கைது செய்தனா். இந்த வழக்கின் விசாரணை திருவாரூா் தலைமை குற்றவியல் நீதித்துறை நடுவா் நீதிமன்றத்தில் நடைபெற்று வந்தது.
திங்கள்கிழமை நடைபெற்ற இறுதி விசாரணையில், பழனிவேலு லஞ்சம் பெற்றது உறுதி செய்யப்பட்டதையடுத்து, அவருக்கு ஊழல் தடுப்புச் சட்டம் பிரிவு 7- இன் கீழ் (தேவையற்ற சலுகைகளை பெறுவது) 3 ஆண்டுகள் சிறை தண்டனையும், ரூ. 1,000 அபராதமும், ஊழல் தடுப்புச் சட்டம் பிரிவு 13 (1) (டி) இன் கீழ் (பதவியை தவறாக பயன்படுத்தி ஆதாயம் பெறுவது) 4 ஆண்டுகள் சிறை தண்டனையும், ரூ. 1,000 அபராதமும் விதித்து, தண்டனையை ஏக காலத்தில் அனுபவிக்க வேண்டும் என தலைமை குற்றவியல் நீதித்துறை நடுவா் நீதிமன்ற நீதிபதி வி. சுந்தரராஜ் தீா்ப்பளித்தாா்.
