திருவண்ணாமலை மாவட்டம், செங்கம் அருகே மாமியாா் வீட்டு மாடியில் தூங்கிக் கொண்டிருந்தவா் மா்ம நபா்களால் வெட்டப்பட்டாா்.
செங்கத்தை அடுத்த மேல்புழுதியூா் பகுதியைச் சோ்ந்தவா் மஞ்சுநாதன்(50). இருவருக்கும் கிருஷ்ணாவரம் பகுதியைச் சோ்ந்த சுமதி(40) என்பவருக்கும் திருமணம் நடைபெற்று ஒரு குழந்தை உள்ளது. இந்த நிலையில், மேல்புழுதியூா் கிராமத்தைச் சோ்ந்த விருத்தாம்பாள் என்பவரை இரண்டாவதாக மஞ்சுநாதன் திருமண் செய்துகொண்டுள்ளாா்.
கடந்த 6 மாதங்களாக இரண்டாவது மனைவியை விட்டுவிட்டு முதல் மனைவி சுமதியுடன் கிருஷ்ணாவரம் பகுதியில் உள்ள சுமதியின் (மாமியாா்) வீட்டில் வசித்து வந்துள்ளாா்.
இந்த நிலையில், புதன்கிழமை விநாயகா் சதுா்த்தி விழாவில் சுவாமி தரிசனம் செய்துவிட்டு இரவு வீட்டின் மாடியில் மஞ்சுநாதன் தூங்கிகொண்டிருந்துள்ளாா். அப்போது, முகமுடி அணிந்து வந்த 3 போ், மஞ்சுநாதன் முகம், தலை, கை ஆகிய பகுதிகளில் சரமாரியாக வெட்டிவிட்டு தப்பிச் சென்றுவிட்டனா்.
மஞ்சுநாதன் அலறல் சப்தம் கேட்டு கீழே இருந்து அவரது மனைவி சுமதி மற்றும் உறவினா்கள் வந்து பாா்த்தபோது மஞ்சுநாதன் கத்தியால் வெட்டப்பட்டு ரத்த வெள்ளத்தில் மயங்கிவிழுந்துள்ளாா். அவரை வெட்டியவா்கள் முகமுடியுடன் ஓடியதை பாா்த்துள்ளனா்.
பின்னா் மஞ்சுநாதனை மீட்டு 108 ஆம்புலன்ஸ் மூலம் செங்கம் அரசு மருத்துவமனையில் சோ்த்தனா்.
மஞ்சுநாதனை வெட்டியவா்கள் யாா்? எதற்காக அவா் வெட்டப்பட்டாா் என்பது குறித்து தெரியவில்லை.
இதுகுறித்து அவா் அளித்த புகாரின் பேரில் செங்கம் போலீஸாா் வழக்குப் பதிந்து விசாரணை நடத்தி வருகின்றனா்.
