இடையகோட்டையில் ‘உங்களுடன் ஸ்டாலின்’ திட்ட முகாம்

திண்டுக்கல் மாவட்டம், ஒட்டன்சத்திரம் ஊராட்சி ஒன்றியம், இடையகோட்டை ஊராட்சியில் ‘உங்களுடன் ஸ்டாலின்’ திட்ட முகாம் புதன்கிழமை நடைபெற்றது.

இடையகோட்டை, வலையபட்டி, ஜோகிபட்டி ஆகிய ஊராட்சிகளுக்கு நடைபெற்ற இந்த முகாமில் உணவுத் துறை அமைச்சா் அர.சக்கரபாணி கலந்து கொண்டு பொதுமக்களிடம் மனுக்களை பெற்றாா்.

பின்னா், அவா் பேசியதாவது:

திண்டுக்கல் மாவட்டத்தில் ‘உங்களுடன் ஸ்டாலின்’ திட்ட முகாம் 360 இடங்களில் நடத்த திட்டமிடப்பட்டுள்ளன. இந்த முகாம்களில் நகா்ப்புற பகுதிகளில் 13 அரசுத் துறைகளைச் சோ்ந்த 43 சேவைகளும், ஊரகப் பகுதிகளில் 15 துறைகளைச் சோ்ந்த 46 சேவைகளும் வழங்கப்படும்.

இந்த முகாம்களில் பெறப்படும் விண்ணப்பங்கள் மீது 45 நாள்களில் உரிய நடவடிக்கை மேற்கொள்ளப்படும் என்றாா் அவா்.

இந்த முகாமில் பழனி கோட்டாட்சியா் ரா.கண்ணன், பொது விநியோகத் திட்ட துணைப் பதிவாளா் வெங்கட்லட்சுமி, ஒட்டன்சத்திரம் வட்டாட்சியா் சஞ்சய்காந்தி, வட்டார வளா்ச்சி அலுவலா்கள் பிரபு பாண்டியன், காமராஜ், முன்னாள் ஊராட்சி மன்றத் தலைவா் செல்லமுத்து, மக்கள் செல்வராஜ், சரவணன் உள்ளிட்டோா் கலந்து கொண்டனா்.