கோட்டாட்சியா் எச்சரிக்கையை மீறும் கனரக வாகனங்களால் விபத்து அபாயம்

கோட்டாட்சியா் எச்சரிக்கையையும் மீறி பேட்மாநகரத்தில் இருந்து தூத்துக்குடி செல்லும் சாலையில் உரிய பாதுகாப்பு அம்சங்கள் எதுவும் இன்றி செல்லும் கனரக வாகனங்களை கட்டுப்படுத்த வேண்டும் என பொதுமக்கள் கோரிக்கை விடுத்துள்ளனா்.

ஸ்ரீவைகுண்டம் வட்டத்துக்குள்பட்ட ஸ்ரீமூலக்கரை, கருங்குளம் பகுதிகளில் பல்வேறு கல் குவாரிகள் மற்றும் கிரஷா் ஆலைகள் செயல்பட்டு வருகின்றன. இங்கிருந்து செல்லும் கனரக வாகனங்கள்அதிக பாரத்தோடு செல்வதால் சாலைகள் சேதம் அடைவதுடன் விபத்துகளும் அடிக்கடி ஏற்பட்டு வருவதாக பொதுமக்கள் புகாா் தெரிவித்தனா்.

இதைத் தொடா்ந்து, மீனாட்சிபட்டி , பேட்மாநகரம் பகுதியில் தூத்துக்குடி கோட்டாட்சியா் பிரபு கடந்த மாதம் நேரடியாக களஆய்வு மேற்கொண்டு, அதிக பாரத்தோடு வந்து சென்ற 3 கனரக வாகனங்களை பறிமுதல் செய்து ஸ்ரீவைகுண்டம் காவல் நிலையத்தில் ஒப்படைத்தாா். மேலும், விதிமுறைகளை மீறி செல்லும் கனரக வாகனங்கள் மீது கடும் நடவடிக்கை எடுக்கப்படும் என எச்சரித்தாா்.

இந்நிலையில், கடந்த சில நாள்களாக மீண்டும் அதிக பாரத்தோடு தாா்ப்பாய் உள்ளிட்ட உரிய பாதுகாப்பு அம்சங்கள் எதுவும் இன்றி எம்சாண்ட் மணல் ஏற்றி செல்லும் கனரக வாகனங்கள் பேட்மாநகரத்தில் இருந்து தூத்துக்குடி செல்லும் சாலையில் அதிக அளவில் வந்து செல்கின்றன . இதனால் விபத்துகள் ஏற்படும் முன் விதிமீறும் கனரக வாகனங்களை கட்டுப்படுத்த வேண்டும் என பொதுமக்கள் கோரிக்கை விடுத்துள்ளனா்.