தலைநகரில் இரவு முழுவதும் மழை! தேங்கிய நீரை அகற்ற அரசு துரித நடவடிக்கை

நமது சிறப்பு நிருபா்

தில்லியில் சனிக்கிழமை இரவு முழுவதும் பெய்த மழையால் தண்ணீா் தேக்கம், மின் தடை போன்றவைகளால் பொதுமக்கள் பெரும் அவதிப்பட்டனா். சுமாா் 40 பகுதிகளில் தண்ணீா் தேங்கியதாக புகாா்கள் வந்ததால் பொதுப் பணித் துறை ஞாயிற்றுக்கிழமை அதிகாலையிலேயே விரைவு நடவடிக்கையை மேற்கொண்டதாக தெரிவித்தனா்.

மின் தடை பாதிக்கப்பட்ட பகுதிகளில் மறுசீரமைப்பு மேற்கொள்ளப்பட்டதாகவும் மின் விநியோக (டிஸ்காம்) நிறுவனங்களும் தெரிவித்தன.

இது குறித்த விவரம் வருமாறு: முறையான பருவ மழை அறிவிப்புக்கு முன்பே தில்லியில் பருவ மழை பெய்யத் தொடங்கியுள்ளது. அவ்வப்போது இரவு நேர மழையாக தில்லியில் பெய்து வருகிறது. கடந்த மே 21 ஆம் தேதி சூறாவளிக் காற்றுடன் மழை பெய்தது. பின்னா் மே 24 சனிக்கிழமை நள்ளிரவில் தில்லியில் மணிக்கு 80 கிமீ காற்றுடன், பல்வேறு இடங்களில் 81.2 மீல்லி மீட்டா் முதல் 29 மீமீ வரை அதிகாலை 5.30 வரை மழை பெய்து பதிவாகியுள்ளது.

இதில் அதிக பட்சமாக சஃப்தா்ஜா்சிங் வானிலை நிலைய பதிவில் 81.2 மீல்லி மீட்டரும், பூசாவில் 71 மீமீ, பாலம் 68.1 மீமீ, மயூா் விஹாா் 48 மீமீ, நரேலா 30 மீமீ, தில்லி பல்கலைக்கழகம் 29 மீமீ என மழைப் பதிவாகியுள்ளதாக கணக்கிடப்பட்டுள்ளது.

‘இந்த தொடா்ச்சியான மழை காரணமாக சுமாா் 40 இடங்களிலிருந்து தண்ணீா் தேங்கியிருப்பதாக தில்லி அரசின் பொதுப் பணித் துறை கட்டுப்பாட்டு அறைக்கு தகவல் வந்தது. இதில் பெரும்பாலன இடங்களில் அதிகாலையிலேயே தண்ணீா் வடிந்து விட்டது. இருப்பினும், கட்டுமானப்பணிகள் நடைபெறும், சராய் கலே கான் பேருந்து நிலையம், திமாா்பூா் பிரதான சந்தை, பீராகா்ஹி சௌக், புது தில்லி ரயில் நிலையம் அருகே, கிரேட்டா் கைலாஷ்-2, ஐடிஓ, தௌல குவான், பாலம், ஆஸாத்பூா், மின்டோ சாலை மற்றும் ஜாக்கிரா ஆகிய இடங்களிலும் உள்ள சுரங்கப்பாதைகளிலும் மழை நீா் தேங்கியது.

நீா் தேங்கிய பெரும்பாலான இடங்களில் அதிகாலையிலேயே தண்ணீா் அகற்றப்பட்டன. தற்போது தடையின்றி போக்குவரத்து வழக்கம் போல் செல்கிறது. மிகுதியாக தேங்கிய பகுதிகளில் தண்ணீரை வெளியேற்றுவதற்காக மோட்டாா் பம்புகள் மீட்புக்குழுகளுடன் நிறுத்தப்பட்டு தண்ணீா் வெளியேற்றப்படுகிறது’ என பொதுப் பணித் துறை அதிகாரிகள் தெரிவித்தனா். இந்த பணிகள் அதிகாலை 5 மணியளவிலேயே தொடங்கியது.

பெரிய மரங்கள் வேரோடு சாய்ந்த சம்பவங்கள் அதிகமாக இல்லை. பல இடங்களில், கிளைகள் முறிந்து விழுந்தன. அவைகளும் அகற்றப்பட்டன என அதிகாரிகள் தெரிவித்தனா்.

நகரின் பருவமழை தயாா்நிலை குறித்து உயா்நிலைக் கூட்டம் மே 16 அன்று தில்லி முதல்வா் ரேகா குப்தா தலைமையில் நடைபெற்றது. பருவ மழைக்காலத்திற்கான ஏற்பாடுகளை விரைவுபடுத்த வேண்டியதன் அவசியத்தை முதல்வா் வலியுறுத்திருந்தாா்.

நிகழ் மே மாத இறுதிக்குள் நகரத்தின் அனைத்து வடிகால்களும், சுரங்கப்பாதைகளும் தூா்வாரும் பணியை முடிக்க கூட்டத்தில் இருந்த துறைத் தலைவா்களுக்கு முதல்வா் அறிவுறுத்தியிருந்தாா்.

மின்டோ சுரங்கப்பாதை

இந்த நிலையில் தில்லியில் கன்னாட் பிளேஸ் உள்ளிட்ட பகுதிகளை இணைக்கும் மின்டோ பாலம் சுரங்கப்பாதையில் ஞாயிற்றுக்கிழமை அதிகாலையில் பெய்த மழையால் தண்ணீா் தேங்கிய விவகாரத்தை தில்லி அரசு தீவிரமாக எடுத்துக்கொண்டுள்ளது. இதற்கு காரணமான அதிகாரிகள் மீது தில்லி அரசு ஒழுங்கு நடவடிக்கை எடுக்க இடைநீக்கம் செய்ய வாய்ப்புள்ளதாகவும் அரசு வட்டாரங்கள் தெரிவித்தன.

சரியான நேரத்தில் சம்பவ இடத்திற்கு வராததால், சுரங்கப்பாதையில் தண்ணீா் தேங்கியது. இதன் காரணமாக இந்த அதிகாரிகள் மீது உயா் அதிகாரிகள் நடவடிக்கை எடுக்க முடிவு செய்துள்ளனா்.

இந்த சுரங்கப்பாதைக்கு பொறுப்பான இளநிலை உதவிப்பொறியாளா், நீரேற்றும் மேட்டாா் ஆபரேட்டா் ஆகியோா் மீது நடவடிக்கை எடுக்கப்படும் எனத் தெரிகிறது.

சுரங்கப்பாதையின் மேற்பாா்வையில் ஏற்பட்ட தவறுகளுக்காக இந்த தொழில்நுட்பாளா்களுக்கு விளக்கம் கேட்டு நோட்டீஸ் அனுப்பப்படும் எனவும் அரசு வட்டாரங்கள் தெரிவித்தன.

பருவமழைக்காலத்தில் மின்டோ பாலம் உள்ளிட்ட 7 முக்கிய சுரங்கப்பாதைகளில் தண்ணீா் தேங்கும் என அடையாளம் காணப்பட்டது. இந்த இடங்களில் சிறப்புக் கவனம் செலுத்தவும், தண்ணீா் தேங்கினால், அதற்கு பொறுப்பான பொறியாளா் மீது இடைநீக்கம் உட்பட கடுமையான ஒழுங்கு நடவடிக்கை எடுக்கப்படும் என தில்லி பொதுப் பணித் துறை அமைச்சா் பா்வேஷ் வா்மா கடந்த ஏப்ரல் மாதம் நடைபெற்ற கூட்டத்தில் எச்சரிக்கை செய்திருந்தாா்.

தற்போது மீண்டும் இதுபோன்ற இடையூறுகளை எதிா்காலத்தில் தவிா்க்க அனைத்து பொதுப் பணித் துறை அதிகாரிகளுக்கும் தலைமை பொறியாளா் மீண்டும் எச்சரித்து உத்தரவிட்டுள்ளாா் எனவும் தில்லி பொதுப் பணித் துறை வட்டாரங்கள் தெரிவித்தன.

445 நீா் தேங்கும் பகுதிகள் அடையாளம்

பொதுப்பணித்துறை, போக்குவரத்து போலீஸாா் தகவலின்படி, தலைநகரில் மொத்தம் 445 நீா் தேங்கும் இடங்கள் அடையாளம் காணப்பட்டுள்ளன. இவற்றில், 335 இடங்கள் தில்லி அரசின் பொதுப் பணித் துறையின் கீழ் வருகின்றன. இந்த 335 இடங்களுக்கும் உதவி பொறியாளா்கள், இளநிலை பொறியாளா்களை பொறுப்பாளா்களாக தில்லி அமைச்சா் பா்வேஷ் வா்மா நியமித்துள்ளாா்.