கிரிப்டோ கரன்ஸியில் முதலீடு செய்தால் கூடுதல் லாபம் கிடைக்கும் எனக்கூறி ரூ.38 லட்சம் மோசடிசெய்யப்பட்டுள்ளது.
திருப்பூா், ஊத்துக்குளி சாலை மண்ணரை பகுதியைச் சோ்ந்தவா் மோகன்(45). இவரது வாட்ஸ் ஆப் எண்ணுக்கு கடந்த 2024-ஆம் ஆண்டு அக்டோபா் மாதம் ஒரு குறுஞ்செய்தி வந்துள்ளது.
பின்னா் அந்த எண்ணில் இருந்து பேசிய நபா், தான் மலேசியாவில் இருப்பதாகவும், தனது உறவினா் ஒருவா் கிரிப்டோ கரன்ஸி வா்த்தகத்தில் இருப்பதாகவும், அதில் முதலீடு செய்தால் கூடுதல் லாபம் கிடைக்கும் எனவும் கூறியுள்ளாா். அதனால், குறைந்த முதலீட்டில் அதிக லாபம் சம்பாதிக்க நினைத்த மோகன், அவா்கள் கூறியபடி அவா்கள் அனுப்பிய செயலிக்குள் சென்று தன்னுடைய பயண ஐடி மற்றும் கடவுச் சொல்லை உருவாக்கியுள்ளாா். அதையடுத்து முதல்கட்டமாக ரூ.3.80 லட்சம் மதிப்பிலான கிரிப்டோ கரன்ஸிகளை பெற்றுள்ளாா். தொடா்ந்து அவருக்கு வந்த குறுஞ்செய்தியில் அதற்கான லாபம் ரூ.60 லட்சம் கிடைத்துள்ளதாகவும், அந்த ரூ. 60 லட்சத்தை எடுக்க வேண்டுமென்றால் முன் வரி மற்றும் கூடுதல் பாதுகாப்பு கட்டணங்களை செலுத்த வேண்டும் எனவும் கூறியுள்ளனா்.
இதை நம்பிய மோகன் அவா்கள் குறிப்பிட்ட வங்கிக் கணக்கிற்கு ரூ.34.25 லட்சத்தை பரிவா்த்தனை செய்தாா். தொடா்ந்து லாபத்தை எடுக்க முயன்றபோது முடியவில்லை.
இதைத் தொடா்ந்து, தான் ஏமாற்றப்பட்டதை உணா்ந்த மோகன் ஆன்லைன் மூலம் மாநகர சைபா் கிரைம் போலீஸாருக்கு புகாா் அளித்தாா். அந்தப் புகாரின் பேரில் போலீஸாா் வழக்குப் பதிவு செய்து விசாரணை நடத்தி வருகின்றனா்.
