இறுதிச்சுற்றில் திவ்யா

ஜாா்ஜியாவில் நடைபெறும் ஃபிடே மகளிா் உலகக் கோப்பை செஸ் போட்டியில் இந்தியாவின் திவ்யா தேஷ்முக் இறுதிச்சுற்றுக்கு முன்னேறி அசத்தினாா்.

அரையிறுதியில் சீனாவின் டான் ஜோங்யியுடன் மோதிய அவா், முதல் கேமை செவ்வாய்க்கிழமை டிரா செய்திருந்தாா். இந்நிலையில், அவருடனான 2-ஆவது கேமில் புதன்கிழமை வெள்ளை நிற காய்களுடன் விளையாடிய திவ்யா, அசத்தலான நகா்வுகளை மேற்கொண்டாா்.

அதன் பலனாக அவா் வெற்றி பெற்றாா் (1-0). இதையடுத்து அரையிறுதியில் மொத்தமாக 1.5 - 0.5 என்ற கணக்கில் டான் ஜோங்யியை வீழ்த்தி இறுதிச்சுற்றுக்கு முதல் வீராங்கனையாக முன்னேறினாா் திவ்யா. அவா் உலகக் கோப்பை போட்டியில் இறுதிச்சுற்றுக்கு வந்தது இதுவே முதல் முறையாகும்.

அத்துடன், அடுத்த ஆண்டு நடைபெறவுள்ள கேண்டிடேட்ஸ் செஸ் போட்டிக்கும் திவ்யா தகுதிபெற்றாா்.

டை-பிரேக்கா்: இதனிடையே அரையிறுதியில் களத்திலிருக்கும் மற்றொரு இந்தியரான கோனெரு ஹம்பி, சீனாவின் லெய் டிங்ஜியுடனான 2-ஆவது கேமையும் டிரா செய்தாா். முதல் கேமையும் இருவரும் டிரா செய்திருந்த நிலையில் இவா்கள் மோதல் தற்போது 1-1 சமநிலையில் உள்ளது.

இதையடுத்து வெற்றியாளரை தீா்மானிப்பதற்கான டை-பிரேக்கா் ஆட்டம் வியாழக்கிழமை நடத்தப்படுகிறது.