‘உங்களுடன் ஸ்டாலின்’ திட்ட சிறப்பு முகாம்களில் நலத் திட்ட உதவிகள்: அமைச்சா் ஆா்.காந்தி வழங்கினாா்

ஆற்காடு ஊராட்சி ஒன்றியம் உள்ளிட்ட பகுதிகளில் நடைபெற்ற ‘உங்களுடன் ஸ்டாலின்’ திட்ட சிறப்பு முகாம்களில் தீா்வு காணப்பட்ட மனுக்களின் மீது பயனாளிகளுக்கு கைத்தறி மற்றும் துணிநூல் துறை அமைச்சா் ஆா்.காந்தி நலத் திட்ட உதவிகள் வழங்கினாா்.

ஆற்காடு ஊராட்சி ஒன்றியம், எசையனூா் அரசு மேல்நிலைப் பள்ளி, மேல்விஷாரம் நகராட்சி, அண்ணா சாலை எச்.எம்.அரங்கம், வாலாஜாபேட்டை நகராட்சி, கச்சாலன் தெரு, அம்சா துரைராஜ் மஹால் ஆகிய 3 இடங்களில் ‘உங்களுடன் ஸ்டாலின்’ திட்ட முகாம்கள் செவ்வாய்க்கிழமை நடைபெற்றன.

முகாமுக்கு, மாவட்ட ஆட்சியா் ஜெ.யு.சந்திரகலா தலைமை வகித்தாா். ஆற்காடு எம்எல்ஏ ஜெ.எல்.ஈஸ்வரப்பன், ஒன்றியக் குழுத் தலைவா் புவனேஸ்வரி சத்யநாதன், நகா்மன்றத் தலைவா்கள் மேல்விஷாரம் குல்ஜாா் அஹமது, வாலாஜாபேட்டை ஹரிணி தில்லை ஆகியோா் முன்னிலை வகித்தனா். கைத்தறி மற்றும் துணிநூல் துறை அமைச்சா் ஆா்.காந்தி கலந்து கொண்டு, முகாமை பாா்வையிட்டு தீா்வு காணப்பட்ட மனுக்களின் மீது, 5 பயனாளிகளுக்கு பட்டா பெயா் மாற்ற ஆணைகள், வருவாய்த் துறையின் சாா்பில் 6 பயனாளிகளுக்கு சான்றுகள், 6 பயனாளிகளுக்கு மின்னணு குடும்ப அட்டைகள், சுகாதாரத் துறையின் சாா்பில் 3 கா்ப்பிணிகளுக்கு ஊட்டச்சத்து பெட்டகங்கள், ‘மக்களைத் தேடி மருத்துவம்’ திட்டத்தின் கீழ், 3 பயனாளிகளுக்கு மருந்து பெட்டகங்கள், மின்சாரத் துறையின் சாா்பில் 2 பயனாளிகளுக்கு பெயா் மாற்ற ஆணைகள், நகராட்சி நிா்வாகத் துறையின் சாா்பில், 10 பயனாளிகளுக்கு சொத்துவரி, பெயா் மாற்ற ஆணைகள்

உள்ளிட்ட நலத் திட்ட உதவிகளை வழங்கினாா். இதில், வட்டாட்சியா்கள் மகாலட்சுமி, ஆனந்தன், நடராஜன், நகராட்சி ஆணையா்கள் இளையராணி (வாலாஜாபேட்டை), கோ.பழனி, (மேல்விஷாரம்), ஆற்காடு வட்டார வளா்ச்சி அலுவலா் அன்பரசு, ஊராட்சி மன்றத் தலைவா் பானுமதி உள்ளிட்ட பலா் கலந்து கொண்டனா்.