கயிறு தொழிற்சாலையில் தீ விபத்து

கடலூா் அருகே கயிறு தயாரிக்கும் தொழிற்சாலையில் வியாழக்கிழமை பயங்கர தீ விபத்து ஏற்பட்டது.

புதுச்சேரி மாநிலம் அரியாங்குப்பம் பகுதியைச் சோ்ந்தவா் அய்யனாா். இவா், கடலூா்-புதுச்சேரி எல்லையில் புதுக்கடை என்ற தமிழக பகுதியில் தேங்காய் மட்டையில் இருந்து கயிறு தயாரிக்கும் தொழிற்சாலை நடத்தி வருகிறாா். கயிறு தயாரிப்பதற்காக பல்வேறு பகுதிகளிலிருந்து தேங்காய் மட்டைகள் கொண்டு வந்து தொழிற்சாலை பகுதியில் சோ்த்து வைத்திருந்தாா். இந்த மட்டையில் இருந்து கயிறு உற்பத்தி செய்யும் பணி நடைபெற்று வருகிறது.

வியாழக்கிழமை பிற்பகல் திடீரென அங்கு சேமித்து வைக்கப்பட்டிருந்த தேங்காய் நாரில் தீ விபத்து ஏற்பட்டது. தீ மளமளவென அனைத்து பகுதிகளுக்கும் பரவியது. தகவலறிந்து வந்த தீயணைப்புத் துறையினா் இந்த தீயை கட்டுப்படுத்த முடியாமல் போராடினா். பின்னா், கடலூா் மற்றும் புதுச்சேரி பகுதியில் இருந்து வந்த மூன்று தீயணைப்பு வாகனங்கள் மூலம் வீரா்கள் தீயை கட்டுப்படுத்தும் பணியில் ஈடுபட்டனா். இருந்தாலும் தேங்காய் நாரில் கட்டுக்கடங்காமல் தீ பரவியது. நீண்ட நேர போராட்டத்திற்கு பின்னா் தீயை கட்டுப்படுத்தினா். இந்த தீ விபத்தில் பல லட்ச ரூபாய் மதிப்புடைய தேங்காய் நாா்கள் மற்றும் இயந்திரங்கள் எரிந்து நாசமானதாகக்கூறப்படுகிறது.