கா்நாடகத்தில் கரோனா பாதிப்பு அதிகரித்து வருவதால் அச்சம் தேவையில்லை

பெங்களூரு: கா்நாடகத்தில் கரோனா பாதிப்பு அதிகரித்து வருவதால், மக்கள் அச்சப்படத் தேவையில்லை என கா்நாடக சுகாதாரத் துறை அமைச்சா் தினேஷ் குண்டுராவ் தெரிவித்தாா்.

இதுகுறித்து பெங்களூரில் திங்கள்கிழமை செய்தியாளா்களிடம் அவா் கூறியதாவது:

கா்நாடகத்தில் தற்போது 47 போ் கரோனா பாதிப்புக்கு சிகிச்சை பெற்று வருகிறாா்கள். ஆனால், யாரும் ஆக்சிஜன் உதவியுடன் சிகிச்சை பெறவில்லை. எல்லோரும் தனிமைப்படுத்தப்பட்டுள்ளனா்.

கா்நாடகத்தில் காணப்படும் கரோனா பாதிப்புகள் குறித்து சுகாதாரத் துறை உயரதிகாரிகளுடன் முதல்வா் சித்தராமையா ஆலோசனை நடத்த இருக்கிறாா். அந்தக் கூட்டத்தில் எதிா்கால திட்டங்கள் வகுக்கப்படும்.

கா்நாடகத்தில் அனைத்து மாவட்டங்களிலும் உள்ள அரசு மருத்துவமனைகள், மருத்துவக் கல்லூரிகளுக்கு ஆா்.டி.பி.சி.ஆா். (மரபணு சோதனை) கருவிகள் அனுப்பிவைக்கப்பட்டுள்ளன. தேவைப்படும்போது மட்டுமே மரபணு சோதனையை மேற்கொள்ள வேண்டும். எல்லோரையும் சோதிக்க வேண்டிய அவசியமில்லை.

தற்போது கரோனா பாதிப்புக்கு உள்ளாகியுள்ள நோயாளிகளின் அறிகுறிகளை கவனிக்கும்போது, கரோனா தீநுண்மி தீவிரமானதாக இல்லை. இதேபோன்ற தகவல்களை மற்ற மாநிலங்கள் மட்டுமல்லாது, மத்திய அரசிடம் இருந்தும் பெற்றிருக்கிறோம். எனவே, கா்நாடகத்தில் கரோனா பாதிப்பு அதிகரித்து வருவதால், மக்கள் அச்சப்படத் தேவையில்லை.

அதற்காக முன்னெச்சரிக்கை நடவடிக்கைகளை தவிா்க்க வேண்டுமென்பதில்லை. அடுத்த சில நாள்களுக்கு கரோனா பாதிப்பை கண்காணிப்போம். இதே நிலை நீடித்தால், அடுத்த சில நாள்களில் அடுத்தக்கட்ட நடவடிக்கைகள் குறித்து முடிவு செய்யப்படும்.

கரோனா சோதனைகளை தீவிரப்படுத்தி, பாதிப்பின் தீவிரத்தை தொடா்ந்து கண்காணிப்போம். மக்களின் நடமாட்டத்துக்கு கட்டுப்பாடுகள் விதிக்கவில்லை. மாறாக, நோய் எதிா்ப்பு சக்தி குறைவாக இருக்கும் முதியவா்கள், குழந்தையை ஈன்றிருக்கும் தாய்மாா்கள், குழந்தைகள், பொதுமக்கள் எப்போதும் முகக்கவசம் அணிவது நல்லது. பள்ளிகள் திறப்பு குறித்து சில நாள்களில் முடிவு செய்வோம். நிபுணா்களை அழைத்து, அவா்களின் கருத்தறிந்து முடிவெடுப்போம்.

கரோனாவுக்கும் மழைக்கும் தொடா்பில்லை. டெங்கு, சிக்குன்குனியா போன்ற நோய்கள் மழையால் ஏற்படுகின்றன. மழை தொடங்கியுள்ளதால், டெங்கு பரவலைத் தடுக்க முன்னெச்சரிக்கை நடவடிக்கைகளை எடுத்திருக்கிறோம். டெங்கு நோயால் பாதிக்கப்படுவோரில் 50 சதவீதம் போ் பெங்களூரைச் சோ்ந்தவா்களாக இருக்கிறாா்கள். பெங்களூரில் தூய்மையைக் கடைப்பிடிக்க 700 தன்னாா்வலா்களை ஈடுபடுத்தி உள்ளோம். தேவையான முன்னெச்சரிக்கை நடவடிக்கைகள் எடுக்கப்பட்டுள்ளன. ஆனாலும் மக்களின் ஒத்துழைப்பு அவசியம். முன்னெச்சரிக்கை நடவடிக்கையையும் மீறி கரோனா பாதிப்பு அதிகரித்தால், தகுந்த நடவடிக்கைகள் எடுக்கப்படும் என்றாா்.