குரூப் 4 தோ்வு எழுதுவோருக்கு சிறப்பு பேருந்துகள்: காஞ்சிபுரம் ஆட்சியா்

காஞ்சிபுரத்தில் வரும் ஜூலை 12-ஆம் தேதி நடைபெறும் குரூப் 4 போட்டித் தோ்வா்கள் தோ்வு மையங்களுக்குச் செல்லும் வகையில் சிறப்புப் பேருந்து வசதி செய்யப்பட்டுள்ளதாக மாவட்ட ஆட்சியா் கலைச்செல்வி மோகன் தெரிவித்துள்ளாா்.

இது குறித்து அவா் செவ்வாய்க்கிழமை வெளியிட்ட செய்திக் குறிப்பு:

தமிழ்நாடு அரசுப் பணியாளா் தோ்வாணையத்தின் சாா்பில், குரூப் 4 போட்டித் தோ்வு வரும் ஜூலை 12-ஆம் தேதி நடைபெறுகிறது. இந்தத் தோ்வுக்குச் செல்லும் விண்ணப்பதாரா்கள் காலை 8.30 மணிக்கு தோ்வுக் கூடத்துக்கு அனுமதிச் சீட்டுடன் வருகை புரிய அறிவுறுத்தப்படுகிறது. விடைத்தாள் காலை 9 மணிக்கும், வினாத்தாள் காலை 9.15 மணிக்கும் வழங்கப்படும். காலை 9.30-க்கு தோ்வு தொடங்கி சரியாக 12.30 மணிக்கு நிறைவடையும். தோ்வா்கள் 12.30 மணிக்கு முன்னா் தோ்வறையிலிருந்து வெளியேற அனுமதிக்கப்பட மாட்டாா்கள்.

விண்ணப்பதாரா்கள் தோ்வாணையத்தின் இணையதளத்திலிருந்து பதிவிறக்கம் செய்யப்பட்ட தோ்வுக்கூட அனுமதிச் சீட்டுடன் தோ்வு நடைபெறும் இடத்துக்கு வர வேண்டும். தவறினால் அவா்கள் தோ்வில் பங்கேற்க அனுமதிக்கப்படமாட்டாா்கள். ஆதாா் அட்டை, கடவுச்சீட்டு, ஓட்டுநா் உரிமம், நிரந்தரக் கணக்கு எண், வாக்காளா் அடையாள அட்டையின் அசல் அல்லது ஒளி நகலை கொண்டு வர வேண்டும். தோ்வா்கள் தோ்வுக் கூடத்துக்கு உள்ளே கைப்பேசி, மின்னணு கடிகாரம் போன்ற மின்னணு சாதனங்களை எடுத்துச் செல்ல அனுமதி இல்லை. தோ்வா்கள் எளிய அனலாக் கடிகாரங்களை பயன்படுத்தலாம்.

தோ்வா்கள் தோ்வு மையங்களுக்குச் செல்ல ஏதுவாக அரசுப் போக்குவரத்துக் கழகத்தின் மூலம் சிறப்பு பேருந்து வசதிகள் காஞ்சிபுரம் பேருந்து நிலையத்திலிருந்து அனைத்து தோ்வு மையங்களுக்கும் தோ்வு நாளன்று காலை 6 மணி முதல் ஏற்பாடு செய்யப்பட்டுள்ளது.