டிரம்ப் வரிவிதிப்பால் வேலை இழப்பு ஏற்படாது: பாஜக மாநிலத் தலைவா் நயினாா் நாகேந்திரன்!

அமெரிக்க அதிபா் டிரம்ப்பின் வரி விதிப்பால் திருப்பூரில் வேலை இழப்பு ஏற்படாது என பாஜக மாநிலத் தலைவா் நயினாா் நாகேந்திரன் தெரிவித்தாா்.

திருப்பூா், பாளையக்காடு பகுதியில் பாஜக மாவட்ட துணைத் தலைவா் காா்த்திக் ஏற்பாட்டில் விநாயகா் சதுா்த்தி கொண்டாடப்பட்டு, 500 பெண்களுக்கு சேலை, குங்குமம் வழங்கும் நிகழ்வில் பாஜக மாநிலத் தலைவா் நயினாா் நாகேந்திரன் சனிக்கிழமை பங்கேற்று பெண்களுக்கு சேலை, குங்குமம் வழங்கினாா்.

பின்னா், செய்தியாளா்களிடம் அவா் கூறியதாவது: தமிழகத்தில் யாா் சுற்றுப்பயணம் செய்தாலும் தேசிய ஜனநாயகக் கூட்டணியை ஒன்றும் செய்ய முடியாது. கவுன்சிலா்கூட ஆகாமல் இவா் என் எதிரி என பேசுவதை ஏற்க முடியாது. பல்வேறு நாடுகளுக்குச் சென்று முதலீடு கொண்டு வந்ததாக முதல்வா் மு.க.ஸ்டாலின் சொல்கிறாா். இதுவரை எந்த முதலீடும் வந்ததாகத் தெரியவில்லை. தமிழக முதல்வா் வெளிநாடு சென்று முதலீடு பெற்ற விவரங்களை வெள்ளை அறிக்கையாகத் தாக்கல் செய்ய வேண்டும்.

அமெரிக்க அதிபா் டிரம்ப் விதித்த வரியால் அவா்களுக்கும் பாதிப்பு உள்ளது. நமக்கும் பாதிப்பு உள்ளது. இதைக் கண்டு பயப்பட முடியாது. திருப்பூா் ஏற்றுமதியாளா்களுக்கும் பாதிப்பு இருக்கிறது. திருப்பூா் பின்னலாடைத் தொழிலில் வேலை இழப்பு ஏற்படாத வகையில் தொழிலாளா்களுக்குப் பாதுகாப்பு வழங்கப்படும் என்று நிதியமைச்சா் நிா்மலா சீதாராமன் கூறி இருக்கிறாா்.

வெளிநாடுகள் மூலம் நம் நாட்டுக்குப் பிரச்னை வரும்போது ஆளுங்கட்சியுடன் சோ்ந்து எதிா்க்கட்சிகள் உதவி செய்ய வேண்டும். அரசியல் குளிா் காயக் கூடாது.

முதல்வா் மனுக்கள் வாங்கினால் அது குப்பையில் போடப்படுவதுதான் திராவிட மாடல். தோ்தலுக்கு இன்னும் 8 மாதங்கள் உள்ளன. தமிழகத்தில் தேசிய ஜனநாயகக் கூட்டணி வலுவாக உள்ளது. இந்தக் கூட்டணிக்கு நிறைய கட்சிகள் வந்து சேரும் என்றாா்.