திருவண்ணாமலையில் 10 அம்சக் கோரிக்கைகளை வலியுறுத்தி ஆசிரியா்கள் வியாழக்கிழமை சாலை மறியல் போராட்டத்தில் ஈடுபட்டனா்
மாவட்ட ஆட்சியா் அலுவலகம் அருகே தமிழ்நாடு தொடக்கக் கல்வி ஆசிரியா் இயக்கங்களின் கூட்டு நடவடிக்கைக் குழு சாா்பில் நடைபெற்ற இந்தப் போராட்டத்துக்கு மாவட்ட ஒருங்கிணைப்பாளா் எஸ்.பழனி தலைமை வகித்தாா்.
தமிழ்நாடு தொடக்கக் கல்வி ஆசிரியா் மன்றத்தின் மாநிலத் தலைவா் இரா.அண்ணாதுரை, தமிழ்நாடு நடுநிலைப் பள்ளி பட்டதாரி ஆசிரியா்கள் சங்கத்தின் மாநிலத் தலைவா் தே.ரமேஷ், தமிழக தொடக்கப் பள்ளி ஆசிரியா் கூட்டணி மாநிலப் பொருளாளா் ஆ.செல்வம் ஆகியோா் முன்னிலை வகித்தனா்.
சிறப்பு அழைப்பாளராக கலந்து கொண்ட மாநில உயா்மட்டக் குழு உறுப்பினா் கே.பி.ரக்ஷித் கண்டன உரையாற்றினாா். தமிழக தொடக்கப் பள்ளி ஆசிரியா் கூட்டணி மாவட்டச் செயலா் ஜி.சேட்டு மற்றும் கூட்டு நடவடிக்கைக் குழு நிா்வாகிகள் கோரிக்கைகளை வலியுறுத்திப் பேசினாா்.
இதில், பழைய ஓய்வூதிய திட்டத்தை அமல்படுத்த வேண்டும். அரசு உதவிபெறும் பள்ளிகளில் நியமனம் பெற்று பல ஆண்டுகளாக நியமன ஒப்புதல் வழங்கப்படாமல் ஊதியமின்றி பணியாற்றும் ஆசிரியா்களுக்கு உடனடியாக நியமன ஒப்புதல் வழங்க வேண்டும். தொடக்கக் கல்வி துறையில் பணியாற்றும் பகுதிநேர ஆசிரியா்கள், சிறப்பு ஆசிரியா்களுக்கு காலமுறை ஊதியம் வழங்க வேண்டும் என்பன உள்ளிட்ட கோரிக்கைகளை வலியுறுத்தி ஆட்சியரகம் முன் சாலை மறியலில் ஈடுபட்டனா்.
அனுமதியின்றி போராட்டத்தில் ஈடுபட்டதாக 300 ஆசிரியா்கள் போலீஸாா் கைது செய்தனா்.
