பராமரிப்புப் பணி: கோவை ரயில்கள் பகுதியாக ரத்து

கோவை, போத்தனூா் ரயில் நிலையத்தில் பராமரிப்புப் பணிகள் நடைபெற உள்ளதால், கோவை ரயில் பகுதியாக ரத்து செய்யப்படுவதாகத் தெரிவிக்கப்பட்டுள்ளது.

இது தொடா்பாக சேலம் ரயில்வே கோட்ட நிா்வாகம் வெளியிட்டுள்ள செய்திக் குறிப்பு: பராமரிப்புப் பணிகள் நடைபெறுவதால், மதுரையில் இருந்து ஜூலை 25, 27-ஆகிய தேதிகளில் காலை 7.05 மணிக்குப் புறப்படும் மதுரை - கோவை விரைவு ரயில் (எண்: 16722) மதுரை - பொள்ளாச்சி இடையே மட்டும் இயக்கப்படும். பொள்ளாச்சி - கோவை இடையே ரத்து செய்யப்படும்.

இதேபோல, கோவையில் இருந்து ஜூலை 25, 27-ஆகிய தேதிகளில் பிற்பகல் 1.50 மணிக்குப் புறப்படும் கோவை - கண்ணூா் விரைவு ரயில் (எண்:16608) அன்று பிற்பகல் 3.10 மணிக்கு பாலக்காட்டில் இருந்து கண்ணூருக்கு புறப்பட்டுச் செல்லும். மேற்கண்ட இரண்டு நாள்களில் கோவை - பாலக்காடு இடையே இந்த ரயில் இயக்கப்படாது எனத் தெரிவிக்கப்பட்டுள்ளது.