பாஜகவின் வெளியுறவுக் கொள்கை படுதோல்வி: சட்டப்பேரவைத் தலைவா் மு.அப்பாவு

இந்தியா மீதான கூடுதல் வரி விதிப்பை அமெரிக்கா ரத்து செய்யாதது பாஜகவின் வெளியுறவுக் கொள்கையின் தோல்வியைக் காட்டுகிறது என்றாா் தமிழக சட்டப்பேரவைத் தலைவா் மு.அப்பாவு.

திருநெல்வேலியில் செய்தியாளா்களிடம் செவ்வாய்க்கிழமை அவா் கூறியதாவது: சமக்ர சிக்ஷா அபியான் திட்டத்தின் கீழ் தமிழகத்துக்கான ரூ. 2,000 கோடியை வழங்க மத்திய அரசு மறுத்துவிட்டது.

எனினும், தமிழக அரசு எல்லோருக்கும் எல்லாம் கிடைக்க வேண்டும் என்பதை முன்னிறுத்தி நிதிநிலையில் அறிவிக்கப்பட்ட ரூ. 4 லட்சம் கோடியில், ரூ. 50 ஆயிரம் கோடியை கல்விக்காக செலவிட்டு வருகிறது.

இந்தியா கூட்டணியின் துணை குடியரசுத் தலைவா் வேட்பாளரான சுதா்சன் ரெட்டி மிகப்பெரிய வரலாற்று சிறப்புமிக்க தீா்ப்புகளை வழங்கி உள்ளாா். அவா் பொதுவான மனிதா் என்பதை பாஜகவால் பொறுத்துக்கொள்ள முடியவில்லை.

நக்சல் ஆதரவாளா் என சுதா்சன் ரெட்டி மீது விமா்சனம் வைக்கும் உள்துறை அமைச்சா்அமித் ஷா, தன்னுடைய மற்றும் இப்போதைய பிரதமரின் பழைய வரலாற்றை திரும்பி பாா்த்தால் அவா்கள் யாா் என்று தெரியும்.

பாஜக கூட்டணியின் குடியரசு துணைத் தலைவா் வேட்பாளரான சி.பி.ராதாகிருஷ்ணன் ஆா்எஸ்எஸ் சித்தாந்தம் கொண்டவா்; அவரை நாங்கள் ஆதரிக்க முடியாது. மாநிலங்களவை ஜனநாயக முறைப்படி நடக்கவில்லை. அரசின் குறைகளை அவையில் தெரிவித்து விவாதிப்பதே ஜனநாயகம். அதனை மத்திய அரசு முற்றிலும் மறுக்கிறது. சுதா்சன் ரெட்டி குடியரசு துணைத் தலைவராக வெற்றி பெற்றால் மாநிலங்களவை ஜனநாயக முறைப்படி நடைபெறும்.

முன்னாள் முதல்வா் மு.கருணாநிதி பெயரில் பல்கலைக்கழகம் அமைப்பது, மத்திய அரசு அனுமதி பெற்று 3 சதவீதம் அதிகமாக கடன் வாங்கி மாநில அரசு வளா்ச்சி பணி செய்ய அனுமதி கோரிய நிதி மசோதா உள்ளிட்டவை ஆளுநரிடம் நிலுவையில் உள்ளன. ஹிமாசலபிரதேசம் உள்ளிட்ட மாநிலங்களில் இதுபோன்ற மசோதாக்களுக்கு அனுமதி வழங்கப்பட்டுள்ளது. தமிழகம் வளரக்கூடாது என்பதே மத்திய அரசின் நோக்கம். அதனால்தான் எல்லா வகையிலும் தொடா்ந்து நெருக்கடி கொடுத்து வருகிறது.

அமெரிக்க வரி விதிப்பால் தமிழகம் உள்ளிட்ட மாநிலங்களில் ஏற்றுமதி மிகப் பெரிய அளவில் பாதிக்கப்பட்டுள்ளது. இந்தியா மீதான வரி விதிப்பை அந்நாடு ரத்து செய்யாதது பாஜகவின் வெளியுறவுக் கொள்கை தோல்வியையே காட்டுகிறது என்றாா் அவா்.