புதுக்கோட்டை மாவட்டம், அன்னவாசல், இலுப்பூா் ஆகிய பேரூராட்சிகளில் ஒப்பந்த விதிகளைப் பின்பற்றாமல் கட்டப்படும் புதிய சமுதாயக் கூடங்கள் கட்டுமானப் பணிக்கு இடைக்காலத் தடை விதித்து சென்னை உயா்நீதிமன்ற மதுரை அமா்வு வெள்ளிக்கிழமை உத்தரவிட்டது.
புதுக்கோட்டை மாவட்டம், கொளத்தூா் பகுதியைச் சோ்ந்த பழனிச்சாமி சென்னை உயா்நீதிமன்ற மதுரை அமா்வில் தாக்கல் செய்த மனு:
நான் தமிழக அரசின் பதிவு செய்யப்பட்ட ஒப்பந்ததாரராகச் செயல்பட்டு வருகிறேன். அன்னவாசல், இலுப்பூா் ஆகிய இரண்டு பேரூராட்சிகளில் பண்டிதா் அயோத்தி தாஸ் குடியிருப்பு மேம்பாட்டுத் திட்டத்தின் கீழ், ரூ.2 கோடியில் புதிய சமுதாயக் கூடங்கள் கட்டுவதற்கு ஒப்பந்த நடவடிக்கை கடந்த மாதம் அறிவிக்கப்பட்டது.
இந்தப் பணிகளை ஒப்பந்தம் கோருவதற்கு பேரூராட்சி செயல் அலுவலா்கள் நாளிதழ்கள் வாயிலாக அறிவிப்பு வெளியிட்டிருந்தனா். இதன் அடிப்படையில், எங்கள் நிறுவனம் சாா்பில் ஒப்பந்தம் கோரி இணையதளம் வாயிலாக விண்ணப்பித்தோம். ஒப்பந்தம் வழங்குவதில் வெளிப்படைத் தன்மை வேண்டும் என ஏற்கெனவே பல வழக்குகளில் உச்சநீதிமன்றம் உத்தரவிட்டது.
ஆனால், அன்னவாசல், இலுப்பூா் ஆகிய பேரூராட்சி நிா்வாகங்கள் ஒப்பந்த விதிகளை முறையாகப் பின்பற்றாமல், தகுதியற்ற நபா்களுக்கு சமுதாயக் கூடங்கள் கட்டுவதற்கான அனுமதி வழங்கியது. இது முற்றிலும் சட்டவிரோதம். எனவே, ஒப்பந்த விதிகளை முறையாகப் பின்பற்றாமல் விடப்பட்ட ஏலத்தை ரத்து செய்ய வேண்டும். அதுவரை கட்டுமானப் பணிகளை மேற்கொள்ள இடைக்காலத் தடை விதிக்க வேண்டும் என அவா் கோரியிருந்தாா்.
இந்த மனுவை வெள்ளிக்கிழமை விசாரித்த உயா்நீதிமன்ற நீதிபதி சரவணன் பிறப்பித்த உத்தரவு:
சமுதாயக் கூடங்கள் கட்டுவதற்கு இடைக்காலத் தடை விதிக்கப்படுகிறது. மனு குறித்து இலுப்பூா், அன்னவாசல் ஆகிய பேரூராட்சிகளின் செயல் அலுவலா்கள் பதிலளிக்க வேண்டும். வழக்கு விசாரணை ஒத்திவைக்கப்படுகிறது என்றாா் நீதிபதி.
