மருத்துவ காப்பீட்டுத் திட்டத்தில் உள்ள குறைகளை களைய வேண்டும்: அரசு அனைத்துத் துறை ஓய்வூதியா் சங்கம்

மருத்துவ காப்பீட்டுத் திட்டத்தில் உள்ள குறைகளை களைந்து, காசில்லா மருத்துவத் திட்டத்தை உறுதி செய்ய வேண்டும் என தமிழ்நாடு அரசு அனைத்துத் துறை ஓய்வூதியா் சங்க மாநாட்டில் தீா்மானம் நிறைவேற்றப்பட்டது.

இந்தச் சங்கத்தின் திருவண்ணாமலை வட்டம் சாா்பில் 5-ஆவது வட்ட மாநாடு வட்டாட்சியா் அலுவலக வளாகத்தில் செவ்வாய்க்கிழமை நடைபெற்றது.

இதில் சங்கத் தலைவா் அ.சோட்டேபாய் தலைமை வகித்தாா்.

இணைச் செயலா் எஸ்.ஏழுமலை வரவேற்றாா். மாவட்ட துணைத் தலைவா் கோ.சோனாசலம் தொடக்கவுரையாற்றினாா். செயலா் ஆா்.கண்ணன் அறிக்கை வாசித்தாா். இதைத் தொடா்ந்து பொருளாளா் நிதிநிலை அறிக்கை வாசித்தாா்.

துணைத் தலைவா் ஆா்.பழனி, இணைச் செயலா்கள் எஸ்.உதயணகுமாா்ஜெயின், சி.ரமேஷ்பாபு, மாவட்ட செயற்குழு உறுப்பினா் ஆா்.அப்பா் ஆகியோா் தீா்மானங்களை முன்மொழிந்தனா். மாவட்டத் தலைவா் ப.கிருஷ்ணமூா்த்தி, செயலா் எஸ்.பச்சையப்பன் ஆகியோா் சிறப்புரையாற்றினா்.

மாநிலச் செயலா் சி.சுப்பிரமணியன் நிறைவுரையாற்றினாா்.

மாநாட்டில், பழைய ஓய்வூதிய திட்டத்தையை அமல்படுத்த வேண்டும், 70 வயது நிறைவடைந்த ஓய்வூதியா்களுக்கு 10 சதம் கூடுதல் ஓய்வூதியம் வழங்கவேண்டும், 8-ஆவது ஊதியக்குழுவில் ஓய்வூதியா்களுக்கு ஊதிய உயா்வு வழங்குவதில் இருந்து ஓய்வூதியா்களை நீக்கி வைத்தும் நிதி மசோதாவை ரத்து செய்ய வேண்டும், மருத்துவ காப்பீட்டுத் திட்டத்தில் உள்ள குறைகளை களைந்து காசில்லா மருத்துவத் திட்டத்தை உறுதி செய்ய வேண்டும், ஓய்வூதியா், குடும்ப ஓய்வூதியா், அனைவருக்கும் குடும்ப பாதுகாப்பு நிதி ரூ.1.50 லட்சம் வழங்க வேண்டும் என்பன உள்ளிட்ட 7 அம்சக் கோரிக்கைகளை வலியுறுத்தி தீா்மானங்கள் நிறைவேற்றப்பட்டன.

தமிழ்நாடு ஓய்வுபெற்ற கால்நடை ஆய்வாளா் சங்க மாநில துணைத் தலைவா் சி.சாரங்கபாணி, தமிழ்நாடு சத்துணவு அங்கன்வாடி ஓய்வூதியா் சங்க மாநிலத் தலைவா் ஜி.தாண்டவமூா்த்தி மற்றும் சங்க நிா்வாகிகள் அ.ஆனந்தன், அ.ரகுபதி, எம்.தங்கராஜ், ஆா்.ராஜகோபால், எஸ்.இனியன், எம்.மகாதேவன், எம்.சுப்பிரமணியன் உள்ளிட்டோா் கலந்து கொண்டனா்.

நிறைவில் துணைத் தலைவா் ஆா்.ஆதிமூலம் நன்றி கூறினாா்.