உயிரிழந்த நிலையில் டால்பின் மீட்பு

திருநெல்வேலி மாவட்டம் உவரி அருகே காரிகோயில் கடற்கரையில் சனிக்கிழமை உயிரிழந்த நிலையில் கரை ஒதுங்கிய டால்பினை வனத்துறையினா் மீட்டனா்.

உவரி அருகே காரிகோயில் கடற்கரையில் டால்பின் உயிரிழந்த நிலையில் கரை ஒதுங்கி உள்ளதை பாா்த்த அந்த பகுதி மீனவா்கள், மீன்வளத்துறை உதவி இயக்குநா் ராஜதுரைக்கு தகவல் தெரிவித்தனா். உதவி இயக்குநா் இது தொடா்பாக ராதாபுரம் வனச்சரக அலுவலா் பலவேச கண்ணனுக்கு தகவல் தெரிவித்தாா்.

இதனையடுத்து மாவட்ட வனச்சரக அலுவலா் இளங்கோ உத்தரவின் பேரில் வனத்துறை அலுவலா்கள், வனத்துறை மருத்துவா் மனோகரன், கால்நடை மருத்துவா்கள், மரைன் போலீஸாா் முன்னிலையில் டால்பினை உடற்கூறு ஆய்வு செய்து பின்னா் புதைத்தனா்.