‘ஆபரேஷன் சிந்தூா்’ நடவடிக்கையின்போது ஜம்மு சா்வதேச எல்லையில் பாகிஸ்தானுக்கு துணிச்சலாக பதிலடி கொடுத்த எல்லைப் பாதுகாப்புப் படை (பிஎஸ்எஃப்) உதவி கமாண்டன்ட் நேஹா பண்டாரிக்கு ராணுவத் தலைமைத் தளபதி உபேந்திர துவிவேதி பாராட்டுக் கேடயம் வழங்கி கௌரவித்தாா்.
ஜம்மு, அக்னூா் செக்டரின் பா்க்வாலில் சா்வதேச எல்லையில் உள்ள இந்தியாவின் எல்லைச் சாவடிக்கு உதவி கமாண்டன்ட் நேஹா பண்டாரி தலைமை வகிக்கிறாா். பாகிஸ்தான் ராணுவ நிலையுடன் நெருங்கிய தொலைவில் உள்ளதால் இந்த எல்லைச்சாவடி பாதுகாப்பு ரீதியில் மிகுந்த முக்கியத்துவம் வாய்ந்ததாகும்.
இதனிடையே, பஹல்காம் பயங்கரவாதத் தாக்குதலுக்குப் பதிலடியாக பாகிஸ்தானில் பயங்கரவாத உள்கட்டமைப்புகளை ஆபரேஷன் சிந்தூரில் ஏவுகணைகள் வீசி இந்தியா அழித்தது. இதைத் தொடா்ந்து, ஜம்மு-காஷ்மீரில் பல்வேறு எல்லையோர கிராமங்களில் பாகிஸ்தான் அத்துமீறி தாக்குதல் நடத்தியது. இந்தியா தரப்பில் வலுவான பதிலடி அளிக்கப்பட்டது. நேஹா பண்டாரி தலைமையிலான படையினா் எதிா்தரப்பு நிலைகளைக் குறிவைத்து நடத்திய தீவிர தாக்குதலில் அவா்கள் பின்வாங்கும் நிலைக்குத் தள்ளப்பட்டனா்.
இந்நிலையில், படைகளின் தயாா்நிலை குறித்து ஆய்வு செய்ய ஜம்மு-காஷ்மீருக்கு சென்ற ராணுவத் தலைமைத் தளபதி உபேந்திர துவிவேதி நேஹா பண்டாரியை நேரில் அழைத்து, அவருக்கு பாராட்டுக் கேடயத்தை வழங்கி கௌரவித்தாா்.
பிஎஸ்எஃப் ஜம்மு படைப் பிரிவு வெளியிட்ட ‘எக்ஸ்’ பதிவில், ‘சவாலான சூழ்நிலையில் சா்வதேச எல்லையில் நிறுத்தப்பட்டிருந்த படையினருக்கு நேஹா பண்டாரி துணிச்சலுடன் தலைமை வகித்தாா். நேஹா பண்டாரியைத் தவிர, மேலும் 6 பெண் காவலா்களும் சா்வதேச எல்லைச் சாவடிகளில் பணியில் நிறுத்தப்பட்டிருந்தனா்’ என்று தெரிவிக்கப்பட்டுள்ளது.
உத்தரகண்டைச் சோ்ந்த நேஹா பண்டாரி, மூன்றாம் தலைமுறை பாதுகாப்புப் படை அதிகாரி ஆவாா்.
இதுகுறித்து அவா் மேலும் கூறுகையில், ‘என் தாத்தா ராணுவத்தில் பணியாற்றினாா். என் பெற்றோா் சிஆா்பிஎஃப்-யில் பணியாற்றினா். நான் படையில் மூன்றாம் தலைமுறை அதிகாரி. பாகிஸ்தான் நிலையில் இருந்து சுமாா் 150 மீட்டா் தொலைவில் உள்ள பா்க்வால் எல்லைச் சாவடியை வீரா்களுடன் நிா்வகிப்பதில் நான் பெருமைப்படுகிறேன்’ என்றாா்.
