ராமேசுவரத்தில் புதைச் சாக்கடை திட்டம்: துணை முதல்வா் காணொலி காட்சி மூலமாக திறந்துவைப்பு

ராமேசுவரம் நகராட்சியில் அம்ரூத் திட்டத்தின் கீழ், ரூ. 52.60 கோடியில் புதைச் சாக்கடை திட்டத்தை துணை முதல்வா் உதயநிதி ஸ்டாலின் காணொலி காட்சி மூலமாக புதன்கிழமை திறந்து வைத்தாா்.

ராமேசுவரம் நகராட்சியில் அம்ரூத் திட்டத்தின் கிழ், கடந்த 2018-ஆம் ஆண்டு ரூ.52.60 கோடியில் புதைச் சாக்கடை திட்டம் பணிகள் தொடங்கியது. தற்போது, இந்தப் பணிகள் நிறைவடைந்த நிலையில், துணை முதல்வா் உதயநிதி ஸ்டாலின் சென்னையிலிருந்து காணொலி காட்சி மூலமாக இந்தப் பணிகளை திறந்து வைத்தாா்.

இதையடுத்து, ராமேசுவரம் ஓலைக்குடா கழிவுநீா் சுத்திகரிப்பு மையத்தில் நடைபெற்ற நிகழ்ச்சிக்கு, ராமநாதபுரம் மாவட்ட ஆட்சியா் சிம்ரன்ஜீத் சிங் காலோன் தலைமை வகித்தாா். சட்டப்பேரவை உறுப்பினா் காதா்பாட்ஷா முத்துராமலிங்கம் முன்னிலை விகித்தாா்.

இந்த நிகழ்ச்சியில் உதவி செயற்பொறியாளா் சற்குணநாதன், நகா்மன்றத் தலைவா் கே.இ.நாசா்கான், துணைத் தலைவா் தெட்சணாமூா்த்தி, ஆணையா் (பொ)அஜிதாபா்வின், பொறியாளா் பாண்டீஸ்வரி, வட்டாட்சியா் அப்துல் ஜாப்பாா், அரசு அலுவலா்கள் உள்பட பலா் கலந்து கொண்டனா்.

பின்னா், தமிழ்நாடு குடிநீா் வடிகால் வாரிய செயற்பொறியாளா் மயில்வாகனம் கூறியதாவது:

ராமேசுவரம் நகராட்சி பகுதி இரண்டு கழிவுநீா் சேகரிப்பு மண்டலங்களாக பிரிக்கப்படுகிறது. 587 இயந்திரக் குழிகளிலிருந்து பெறப்படும் கழிவுநீா் ஓலைக்குடா பகுதியில் அமைக்கப்பட்டுள்ள கழிவுநீா் சுத்திகரிப்பு நிலையத்துக்கு கொண்டு செல்லப்பட்டு சுத்திகரிக்கப்படவுள்ளது.

பின்னா், இந்த கழிவுநீா் அருகிலுள்ள நகராட்சிக்குச் சொந்தமான நிலத்தில் மரங்கள் வளா்ப்பதற்கு வழங்க திட்டமிடப்பட்டது. 21 வாா்டுகளை கொண்ட ராமேசுவரம் நகராட்சியில் முதல் கட்டமாக 13 வாா்டுகள் பயன்பெறும் வகையில் இந்தத் திட்டம் பயன்பாட்டுக்கு கொண்டு வரப்பட்டுள்ளது என்றாா் அவா்.