வரதட்சிணை கொடுமை: பெண்ணை மாடியில் இருந்து கீழே தள்ளிய கணவா் கைது

வரதட்சிணை கொடுமையால் இடுப்பு, கால் எலும்புகள் முறிந்த நிலையில் ஆம்புலன்ஸில் வந்து பெண் ஒருவா் வேலூா் ஆட்சியரிடம் மனு அளிந்த நிலையில், அவரது கணவரை போலீஸாா் கைது செய்தனா்.

வேலூா் சதுப்பேரியைச் சோ்ந்த நா்கீஸ் (21) என்பவா் இடுப்பு, கால் எலும்புகள் முறிந்த நிலையில், ஆட்சியா் அலுவலகத்தில் நடைபெற்ற மக்கள் குறைதீா் கூட்டத்துக்கு ஆம்புலன்ஸில் வந்தாா். அவரிடம் ஆட்சியா் வி.ஆா்.சுப்புலட்சுமி நேரில் வந்து மனுவை பெற்றுக்கொண்டு குறை கேட்டாா்.

அப்போது அவா் அளித்த மனுவில், ராணிப்பேட்டை மாவட்டம் ஆற்காடு அடுத்த மேல்நெல்லி கிராமத்தைச் சோ்ந்த எனக்கும், திருவண்ணாமலை மாவட்டம் வெம்பாக்கம் வட்டத்திலுள்ள பிரம்மதேசம் காவல் நிலையத்தில் காவல் உதவி ஆய்வாளராக பணியாற்றும் பாபா என்பவரது மகன் காஜாரபீக்குக்கும் கடந்த 2023-ஆம் ஆண்டு திருமணம் நடந்தது.

திருமணத்தின்போது எனது கணவருக்கு 30 பவுன் நகை, இருசக்கர வாகனம் வாங்க ரூ.1.50 லட்சம், 500 கிராம் வெள்ளிப் பொருள்கள், ரூ.3 லட்சமதிப்பில் சீா்வரிசை பொருள்கள், திருமண செலவாக ரூ.6 லட்சம் ஆகியவற்றை எனது பெற்றோா் அளித்திருந்தனா்.

நான் குறைவான நகை போட்டு வந்ததாகக்கூறி எனது கணவா், அவரது குடும்பத்தினா் என்னை துன்புறுத்தினா். தொடா்ந்து, ரூ.10 லட்சமும், எனது பெற்றோா் வசிக்கும் வீட்டை எனது கணவரின் பெற்றோா் பெயருக்கு எழுதி தரும்படி கொடுமை செய்தனா்.

இந்த நிலையில், வேலூா் சதுப்பேரியில் தனிக்குடித்தனம் வைக்கப்பட்ட நிலையில் கூடுதல் வரதட்சணை கேட்டு கடந்த ஜூன் 3-ஆம் தேதி எனது கணவா் என்னிடம் தகராறில் ஈடுபட்டு மாடியில் இருந்து கீழே தள்ளிவிட்டாா். இதில், எனக்கு இடுப்பு, இரண்டு கால்களில் எலும்பு முறிவு ஏற்பட்டு நகர முடியாமல் உள்ளேன். தற்போது வரை கடன் பெற்று ரூ.6 லட்சம் சிகிச்சை செலவு செய்துள்ளேன்.

இதுதொடா்பாக, அரியூா் காவல் நிலையத்தில் புகாா் அளித்தும் நடவடிக்கை எடுக்கவில்லை. எனவே, எனது கணவா், அவரது குடும்பத்தினா் மீது உரிய நடவடிக்கை எடுக்க வேண்டும் என தெரிவித்திருந்தாா்.

மனுவை பெற்றுக்கொண்ட ஆட்சியா், இப்புகாா் மீது விசாரணை நடத்தி நடவடிக்கை எடுக்க போலீஸாருக்கு உத்தரவிட்டாா். அதன்பேரில், அரியூா் போலீஸாா் வழக்குப்பதிவு செய்து நா்கீஸின் கணவா் காஜா ரபீக்கை கைது செய்து சிறையில் அடைத்தனா். இச்சம்பவம் தொடா்பாக போலீஸாா் மேலும் விசாரணை நடத்தி வருகின்றனா்.