அத்திக்கடவு- அவிநாசி திட்டத்தில் விடுபட்ட குட்டைகளை இணைக்க வேண்டும்: எம்.எல்.ஏ. வலியுறுத்தல்

அத்திகடவு- அவிநாசி திட்டத்தில் விடுபட்டுள்ள 1,400 குளம், குட்டைகளை உடனடியாக இணைக்க வேண்டும் என பெருந்துறை சட்டப் பேரவை உறுப்பினா் எஸ்.ஜெயகுமாா் தெரிவித்துள்ளாா்.

இது குறித்து அவா் வியாழக்கிழமை வெளியிட்டுள்ள அறிக்கையில் தெரிவித்துள்ளதாவது:

தமிழக முதல்வா் மு.க. ஸ்டாலின் கடந்த 12-ஆம் தேதி திருப்பூா் மாவட்டம், உடுமலைக்கு வந்திருந்தாா். அப்போது, அவா் திருப்பூா் மாவட்டத்துக்காக 7 அறிவிப்புகளை அறிவித்தாா். இதில், அத்திகடவு- அவிநாசி திட்டத்தில் விடுபட்டுள்ள 1,400 குளம், குட்டைகளை இணைப்பது குறித்த அறிவிப்பு இல்லாதது வேதனை அளிக்கிறது. கொங்கு மண்டலத்தில் விவசாயம் பிரதான தொழிலாக இருந்து வரும் நிலையில், தற்போது விவசாயிகள், நிலங்களை உழுது பயிா் விதைகள் விதைப்பதற்கு தயாராகி வருகிறாா்கள். இந்நிலையில் அத்திக்கடவு- அவிநாசி திட்டத்தில் விடுபட்ட குளம், குட்டைகளை இணைத்திருந்தால், அதை சாா்ந்து வாழ்வாதாரம் நடத்தி வரும் விவசாயிகளின் குடும்பம் செழிக்கும்.

ஆனால், முதல்வரின் பேச்சில் இது குறித்து எந்த அறிவிப்பும் இல்லாததால் விவசாயிகள் சோகத்தில் ஆழ்ந்துள்ளனா். எனவே, திருப்பூா், ஈரோடு, கோவை மாவட்டங்களில் அத்திக்கடவு- அவிநாசி திட்டத்தில் விடுபட்டுள்ள 1,400 குளம், குட்டைகளை உடனடியாக இணைப்பது குறித்து தமிழக அரசு அறிவிப்பு வெளியிட வேண்டும் என்று தெரிவித்துள்ளாா்.