கவுந்தப்பாடி அருகே கிணற்றில் தவறி விழுந்த இளைஞா் உயிரிழந்தாா்.
ஈரோடு மாவட்டம், ஓடத்துறை, நஞ்சகவுண்டம்பாளையம், மசக் கவுண்டா் வீதியைச் சோ்ந்தவா் கனகராஜ் (27). முடிதிருத்தும் கடையில் வேலை பாா்த்து வந்தாா். இவருக்குத் திருமணம் ஆகவில்லை. அதே பகுதியில் வாடகை வீட்டில் குடியிருந்து வந்தாா். கடந்த 11ஆம் தேதி சலூன் கடைக்குச் சென்ற கனகராஜ் அதன் பின்னா் வீடு திரும்பவில்லை. இதனால் கனகராஜ் பெற்றோா் அவரைப் பல்வேறு இடங்களில் தேடி வந்தனா்.
இந்நிலையில், அப்பகுதியில் உள்ள மக்கள் பயன்படுத்தாத கிணற்றில் நாய் ஒன்று புதன்கிழமை மாலை தவறி விழுந்தது. நாயை மீட்க அந்தப் பகுதியைச் சோ்ந்தவா்கள் கிணற்றில் எட்டிப் பாா்த்தபோது ஆண் சடலம் மிதந்து கொண்டிருப்பதைக் கண்டு அதிா்ச்சி அடைந்தனா்.
இது குறித்து அப்பகுதி மக்கள் தீயணைப்பு நிலையத்துக்கும், கவுந்தப்பாடி காவல் நிலையத்துக்கும் தகவல் தெரிவித்தனா். சம்பவ இடத்துக்கு வந்த தீயணைப்பு வீரா்கள் கிணற்றில் இறங்கி சடலத்தை மீட்டு வெளியே எடுத்து வந்து பாா்த்தபோது உயிரிழந்தவா் கனகராஜ் என தெரியவந்தது.
கனகராஜ் மதுபோதையில் கிணற்றில் தவறி விழுந்து இறந்தது போலீஸ் விசாரணையில் தெரியவந்துள்ளது. இது குறித்து கவுந்தப்பாடி போலீஸாா் வழக்குப் பதிவு செய்து விசாரணை நடத்தி வருகின்றனா்.
