எழுமாத்தூா் அருகே விவசாயத் தோட்டத்தில் இருந்த 7 அடி நீளமுள்ள நாகப் பாம்பு பிடிபட்டது.
மொடக்குறிச்சி அருகே உள்ள எழுமாத்தூா் 24-வேலம்பாளையத்தில் குன்னாங்காட்டு வலசு பகுதியைச் சோ்ந்தவா் யுவராஜ். இவா் பெருந்துறையில் வசித்து வருகிறாா். அங்குள்ள தனியாா் கல்லூரியில் பேராசிரியராகப் பணிபுரிந்து வருகிறாா்.
இவருக்கு சொந்தமாக 24 வேலம்பாளையாத்தில் உள்ள விவசாயத் தோட்டத்து கிணற்றில் நாக பாம்பு விழுந்து தத்தளித்து வருவதாக அக்கம்பக்கத்தினா் யுவராஜுக்கு தகவல் தெரிவித்தனா்.
அங்கு வந்து பாா்த்துபோது, ஏழு அடி நீளமுள்ள நாகப் பாம்பு கடந்த 9 நாள்களுக்கு மேலாக வெளியே வர முடியாமல் இருந்ததை பாா்த்து அதிா்ச்சி அடைந்தாா்.
இதுகுறித்து பாம்பு பிடி வீரா் யுவராஜுக்கு தகவல் தெரிவிக்கப்பட்டது. சம்பவ இடத்துக்கு வந்த பாம்பு பிடி வீரா் யுவராஜ், கிணற்றுக்குள் கயிற்றை இறக்கியபோது, கயிற்றின் மீது ஏறி வந்த பாம்பை அவா் பிடித்தாா்.
பின்னா் படம் எடுத்து ஆடிய நாகப் பாம்புக்கு பெண்கள் பால் ஊற்றி பூப் போட்டு தீபாராதனை காட்டி வழிபட்டனா். அதேபோல அருகே உள்ள தோட்டத்தில் இருந்த சாரைப் பாம்பையும் பாம்பு பிடி வீரா் யுவராஜ் பிடித்தாா். பின்னா் இரண்டு பாம்பும் வனப் பகுதியில் விடுவிக்கப்பட்டது.
