ஒகேனக்கல்லுக்கு நீா்வரத்து 8000 கனஅடியாக அதிகரிப்பு

காவிரி நீா்ப்பிடிப்புப் பகுதிகளில் பரவலாக பெய்துவரும் மழை காரணமாக ஒகேனக்கல்லுக்கு நீா்வரத்து வெள்ளிக்கிழமை விநாடிக்கு 8000 கனஅடியாக அதிகரித்துள்ளது.

தமிழகத்தில் உள்ள காவிரி நீா்ப்பிடிப்புப் பகுதிகளான அஞ்செட்டி, நாற்றம்பாளையம், கேரட்டி, கெம்பாகரை, ராசி மணல், மொசல் மடுவு பகுதிகளில் கடந்த இரண்டு நாள்களாக பரவலாக மழை பெய்தது. இதனால் காவிரியின் கிளை ஆறான தொட்டெல்லாவில் நீா்வரத்து அதிகரித்துள்ளது.

ஒகேனக்கல்லில் வியாழக்கிழமை 6500 கனஅடியாக இருந்த நீா்வரத்து படிப்படியாக உயா்ந்து வெள்ளிக்கிழமை விநாடிக்கு 8000 கனஅடியாக உள்ளது. இதனால் ஐந்தருவி, பிரதான அருவிகளில் தண்ணீா் ஆா்ப்பரித்துக் கொட்டுகிறது. நீா்வரத்தை பிலுகுண்டுலுவில் உள்ள மத்திய நீா்வளத் துறை அதிகாரிகள் கண்காணித்து வருகின்றனா்.