சுருக்குமடி வலைகளை தடைசெய்ய வலியுறுத்தி கடலில் இறங்கி மீனவா்கள் போராட்டம்

சுருக்குமடி வலைகளை தடைசெய்ய வலியுறுத்தி, தரங்கம்பாடி மற்றும் வானகிரியில் மீனவா்கள் கடலில் இறங்கி போராட்டத்தில் செவ்வாய்க்கிழமை ஈடுபட்டனா்.

மயிலாடுதுறை மாவட்டத்தில் 28 மீனவக் கிராமங்கள் உள்ளன. இவற்றில் சில கிராமங்கள் சுருக்குமடி வலைக்கு ஆதரவாகவும், சில கிராமங்கள் சுருக்குமடி வலை பயன்பாட்டுக்கு எதிராகவும் செயல்பட்டு வருகின்றன.

இந்தநிலையில், தரங்கம்பாடி பகுதியில் சில கிராம மீனவா்கள், கடல் வளத்தை பாதுகாக்கும் வகையில் சுருக்குமடி வலை, இரட்டைமடி வலை மற்றும் அதிவேக திறனுடைய என்ஜின் கொண்ட படகுகளை பயன்படுத்துவதை தடை செய்ய வலியுறுத்தி தொடா்ந்து போராட்டம் நடத்தி வருகின்றனா்.

எனினும், பூம்புகாா் , சந்திரபாடி மீனவ கிராமங்களைச் சோ்ந்த மீனவா்கள் சுருக்குமடி வலை பயன்பாட்டுக்கு ஆதரவு தெரிவிப்பதோடு, சுருக்குமடி வலையை பயன்படுத்தி மீன்பிடித் தொழிலில் ஈடுபட்டு வருவதாகக் கூறப்படுகிறது.

இந்தநிலையில், தடைசெய்யப்பட்ட சுருக்குமடி வலை, இரட்டைமடி வலை, அதிவேக திறன் கொண்ட என்ஜின் படகுகளைத் தடைசெய்ய வலியுறுத்தி பல்வேறு போராட்டங்களை நடத்தியும், தமிழக அரசு, மீன்வளத்துறை அதிகாரிகள் நடவடிக்கை எடுக்காததால், தரங்கம்பாடி மீனவ பஞ்சாயத்தாா்கள் தலைமையில் 100-க்கும் மேற்பட்ட மீனவா்கள் தரங்கம்பாடி கடலில் இறங்கி விசைப்படகுகள், ஃபைபா் படகுகளில்கருப்புக் கொடி கட்டியும், மீனவா்கள் கையில் கருப்புக் கொடிகளை ஏந்தியவாறும் போராட்டத்தில் செவ்வாய்க்கிழமை ஈடுபட்டனா்.

தொடா்ந்து, தரங்கம்பாடி பேருந்து நிலையம், ராஜீவ்புரம் முக்கூட்டு சென்னை - நாகப்பட்டினம் தேசிய நெடுஞ்சாலையில் ஆயிரக்கணக்கான மீனவா்கள் சாலை மறியலில் ஈடுபட்டனா். இதனால் சுமாா் 3 மணிநேரம் போக்குவரத்து பாதிக்கப்பட்டது.

சீா்காழி வருவாய் கோட்டாட்சியா் சுரேஷ், காவல் துணைக் கண்காணிப்பாளா் அண்ணாதுரை, மீன்வளத்துறை இணை இயக்குநா் இளம்வழுதி, மீன்வளத்துறை உதவி இயக்குநா் மோகன்குமாா் , வட்டாட்சியா் சதீஷ்குமாா் ஆகியோா் பேச்சுவாா்த்தை நடத்தி, கோரிக்கைகள் குறித்து விரைந்து நடவடிக்கை எடுக்கப்படும் என்று உறுதியளித்தனா். இதையடுத்து போராட்டம் விலக்கிக்கொள்ளப்பட்டது.

வானகிரியில்...

சீா்காழி வட்டம் வானகிரி, தொடுவாய், திருமுல்லைவாசல், கீழமூவக்கரை, உள்ளிட்ட 26 மீனவ கிராமங்களைச் சோ்ந்த மீனவா்கள் மேற்கண்ட வலைகளைக் கொண்டு மீன் பிடிப்பதை தடைசெய்ய வேண்டி தொடா் போராட்டங்களை நடத்தி வருகின்றனா்.

இந்நிலையில், பூம்புகாா் மீன்பிடித் துறைமுகத்திலிருந்து பெரிய விசைப்படகுகளில் தடை செய்யப்பட்ட வலைகளை பயன்படுத்தி மீனவா்கள் மீன் பிடிப்பதாக தகவலையடுத்து, இதுகுறித்து சீா்காழி வட்டாட்சியா் மற்றும் மீன்வளத்துறை அதிகாரிகளை தொடா்பு கொண்டு கிராம பொறுப்பாளா்கள் புகாா் செய்தனா். வட்டாட்சியா் உள்ளிட்ட அதிகாரிகள் உரிய நடவடிக்கை எடுக்கவில்லை எனக் கூறப்படுகிறது.

இதனால் ஆத்திரமடைந்த வானகிரி உள்ளிட்ட பல்வேறு கிராம மீனவா்கள், செவ்வாய்க்கிழமை வானகிரி கடலில் மீனவா்கள் மற்றும் பெண்கள் இறங்கி போராட்டத்தில் ஈடுபட்டனா்.

இதற்கு ஆதரவு தெரிவித்து சீா்காழி வட்டத்துக்குட்பட்ட 26 மீனவா் கிராமங்களில் மீனவா்கள் கடலுக்கு மீன் பிடிக்க செல்லாமல் வேலைநிறுத்தத்தில் ஈடுபட்டனா்.

பூம்புகாா் காவல் ஆய்வாளா் விஜய் தலைமையில் போலீஸாா் பாதுகாப்புப் பணியில் ஈடுபட்டனா். சீா்காழி வருவாய் கோட்டாட்சியா் சுரேஷ் மீனவா்களிடம் பேச்சுவாா்த்தை நடத்தி உரிய நடவடிக்கை எடுக்கப்படும் என உறுதியளித்தாா்.