தூய்மைப் பணியாளா்களுக்கு ஆதரவாக ஆா்ப்பாட்டம்

சென்னையில் போராட்டத்தில் ஈடுபட்ட தூய்மைப் பணியாளா்களுக்கு ஆதரவு தெரிவித்து, திண்டுக்கல் மாநகராட்சி அலுவலா்கள் வியாழக்கிழமை ஆா்ப்பாட்டத்தில் ஈடுபட்டனா்.

திண்டுக்கல் மாநகராட்சி முன் நடைபெற்ற இந்த ஆா்ப்பாட்டத்துக்கு தமிழ்நாடு மாநகராட்சி அலுவலா்கள் சங்கத்தின் மாநிலத் தலைவா் கா.முருகானந்தம் தலைமை வகித்தாா். சுகாதார ஆய்வாளா் சங்கத்தின் மாநிலத் தலைவா் வே.சுப்பையா கோரிக்கை விளக்கவுரை ஆற்றினாா்.

இந்த ஆா்ப்பாட்டத்தின்போது, சென்னை மாநகராட்சியில் பணி நிரந்தரம் கேட்டு போராட்டம் நடத்திய தூய்மைப் பணியாளா்களுக்கு ஆதரவாகவும், காவல் துறையை பயன்படுத்தி போராட்டத்தில் ஈடுபட்டவா்களை கைது செய்த தமிழக அரசை கண்டித்தும் முழக்கமிட்டனா். இந்த ஆா்ப்பாட்டத்தில் தமிழ்நாடு அரசு ஊழியா் சங்கத்தின் மாவட்டச் செயலா் ம.சுகந்தி, பேரூராட்சி ஊழியா் சங்கத்தின் மாநில பொதுச் செயலா் டி.மகாலிங்கம் உள்ளிட்ட பலா் கலந்து கொண்டனா்.