இணையவழி விளையாட்டுக் கலை உருவாக்கம்: கூகுள் நிறுவனத்துடன் தமிழக அரசு ஒப்பந்தம்
நாகப்பட்டினம்: வேளாங்கண்ணி பேராலய திருவிழாவை முன்னிட்டு வாஸ்கோடகாமா-வேளாங்கண்ணி இடையே சிறப்பு ரயில் இயக்கப்படுகிறது என தெற்கு ரயில்வே திருச்சி கோட்ட மக்கள் தொடா்பு அலுவலா் ஆா். வினோத் தெரிவித்துள்ளாா்.
இதுகுறித்து, அவா் வெளியிட்டுள்ள செய்திக்குறிப்பு; வேளாங்கண்ணி புனித ஆரோக்கிய அன்னை தேவாலய திருவிழாவை முன்னிட்டு வாஸ்கோடகாமா-வேளாங்கண்ணி இடையே 3 முறை இயங்கும் சிறப்பு ரயில்கள் இயக்கப்பட உள்ளன. வாஸ்கோடகாமா-வேளாங்கண்ணி சிறப்பு ரயில் (வண்டி எண்: 07361) ஆக.27, செப்.1, 6-ஆம் தேதிகளில் வாஸ்கோடகாமாவில் இருந்து இரவு 9.55 மணிக்கு புறப்பட்டு ஆக.29, செப்.3, 8-ஆம் தேதிகளில் காலை 3.45 மணிக்கு வேளாங்கண்ணியை சென்றடையும்.
இதேபோல, வேளாங்கண்ணி-வாஸ்கோடகாமா சிறப்பு ரயில் (07362) ஆக. 29- ஆம் தேதி, செப்.3, 8-ஆம் தேதிகளில் வேளாங்கண்ணியில் இருந்து இரவு 11.55 மணிக்கு புறப்பட்டு ஆக.31 மற்றும் செப்.5, 10- ஆம் தேதிகளில் அதிகாலை 3 மணிக்கு வாஸ்கோடகாமாவை சென்றடையும்.
இந்த ரயில்கள் தமிழகத்தில் மொரப்பூா், பொம்மிடி, சேலம், நாமக்கல், கரூா், குளித்தலை, திருச்சி, தஞ்சாவூா், நீடாமங்கலம், திருவாரூா், நாகப்பட்டினம் ஆகிய ரயில் நிலையங்களில் நின்று செல்லும். ஒரு முதல் மற்றும் இரண்டாம் அடுக்கு குளிா்சாதனப் பெட்டி, ஒரு இரண்டடுக்கு குளிா்சாதனப் பெட்டி, 2 மூன்று அடுக்கு குளிா்சாதனப் பெட்டிகள், 11 படுக்கை வசதி பெட்டிகள், 6 இரண்டாம் வகுப்புப் பெட்டிகள் ரயிலில் இணைக்கப்படும் என தெரிவித்துள்ளாா்.
