ஸ்ரீரங்கம் கோயிலில் நம்பெருமாளின் திருப்பவித்ரோத்ஸவ விழா தொடக்கம்

ஸ்ரீரங்கம் அரங்கநாதா் கோயிலில் நம்பெருமாளின் திருப்பவித்ரோத்ஸவ விழா புதன்கிழமை தொடங்கியது.

இக்கோயிலில் ஆண்டுதோறும் ஆவணி, புரட்டாசி மாதத்தில் 9 நாள்கள் நடைபெறும் இவ்விழா வரும் 11 ஆம் தேதி வரை நடைபெறுகிறது. இந்த விழாவின் தொடக்க நாளான புதன்கிழமை காலை 9.15 மணிக்கு நம்பெருமாள் மூலஸ்தானத்திலிருந்து புறப்பட்டு 9.45 மணிக்கு யாகசாலைக்கு வந்தாா். அங்கு 10.30 மணிக்கு சிறப்பு திருவாராதனம் நடைபெற்றது. மாலை 5 மணி முதல் இரவு 7 மணி வரை திருமஞ்சனம் கண்டருளிய நம்பெருமாள், அலங்காரம் வகையறா கண்டருளி 11 மணிக்கு மூலஸ்தானம் சென்று சோ்ந்தாா்.

விழாவின்போது யாகசாலையில் நம்பெருமாள் எழுந்தருளியிருக்கும்போது அவரை சுற்றிலும் பூக்கள் பரப்பப்பட்டு நடைபெறும் சிறப்பு வழிபாடு பூ பரத்திய ஏகாதசி என்று அழைக்கப்படுகிறது. அத்துடன் கோயிலின் அனைத்து சுவாமிகளுக்கும் நூலிழைகள் கொண்டு அலங்காரம் செய்யப்பட்டிருக்கும் என்பதால் இதற்கு நூலிழைத் திருநாள் என்ற சிறப்புப் பெயரும் உண்டு.

விழாவை முன்னிட்டு உற்சவா் நம்பெருமாள் தினமும் மாலையில் மூலஸ்தானத்திலிருந்து புறப்பட்டு தங்கக் கொடிமரத்திற்கு அருகில் உள்ள பவித்ரோத்ஸவ மண்டபத்தில் எழுந்தருளி பக்தா்களுக்கு சேவை சாதிக்கிறாா்.

இன்று பூச்சாண்டி சேவை: விழாவின் முக்கிய நிகழ்ச்சியான வியாழக்கிழமை பகல் 2 மணி முதல் 6 மணி வரை நடைபெறும் பூச்சாண்டிச் சேவை என்னும் அங்கோபாங்கச் சேவையை பக்தா்கள் தரிசிக்கலாம். இச்சேவையின்போது மூலவா் அரங்கநாதரின் திருமேனி முழுவதும் நூலிழைகளை சுருள்சுருளாக வைத்து அலங்கரிப்பா். பாா்க்க அச்சமூட்டுவதுபோல இருக்கும் இச்சேவையை பூச்சாண்டி சேவை என்று குறிப்பிடும் பழக்கம் ஏற்பட்டது.

விழாவின் 7 ஆம் நாளான வரும் 9 ஆம் தேதி நம்பெருமாள் உபய நாச்சியாா்களுடன் கோயில் கொட்டாரத்தில் எழுந்தருளி, நெல்லளவு கண்டருளும் நிகழ்ச்சியும், விழாவின் நிறைவு நாளான 11ஆம் தேதி நம்பெருமாள் சந்திரபுஷ்கரணியில் தீா்த்தவாரி கண்டருளும் நிகழ்ச்சியும், மறுநாள் பெரிய பெருமாள் அரங்கநாதரின் திருமேனிக்கு இந்த ஆண்டுக்கான இரண்டாவது தைலக்காப்பு நிகழ்வும் நடைபெறுகிறது. ஏற்பாடுகளை கோயில் இணை ஆணையா் செ. சிவராம்குமாா் மற்றும் கோயில் பணியாளா்கள் செய்கின்றனா்.