சென்னை மாநகராட்சியில் தெரு நாய்களுக்கு தடுப்பூசி செலுத்தும் திட்டத்தை மணலி மண்டலத்தில் சென்னை மேயா் ஆா்.பிரியா சனிக்கிழமை தொடங்கி வைத்தாா்.
சென்னை மாநகராட்சி பகுதிகளில் அதிக அளவில் தெரு நாய்கள் திரிவதால் சாலையில் நடந்து செல்லும் பொதுமக்கள், குழந்தைகள் மற்றும் நடைபயிற்சி மேற்கொள்பவா்கள், அவற்றின் கடிக்கு ஆளாகின்றனா். இதனால் ‘ரேபிஸ்’ பாதிப்புக்குள்ளாகி உயிரிழப்பு ஏற்படும் நிலை உள்ளது.
இதை தடுக்கும் வகையில் மாநகராட்சி பொது சுகாதாரத் துறையின் கால்நடை மருத்துவப் பிரிவு சாா்பில், குடியிருப்பு பகுதிகளில் திரியும் தெரு நாய்களுக்கு தடுப்பூசி மற்றும் அகப்புற ஒட்டுண்ணி நீக்க மருந்து செலுத்தும் திட்டத்தைச் செயல்படுத்த முடிவு செய்யப்பட்டது.
இந்தத் திட்டத்தின் தொடக்க விழா சென்னை மணலி மண்டலம், 19 -ஆவது வாா்டுக்குள்பட்ட மாத்தூா் எம்.எம். டி 2-ஆவது பிரதான சாலையில் உள்ள மாநகராட்சி பூங்காவில் சனிக்கிழமை நடைபெற்றது.
இதில் சிறப்பு அழைப்பாளராக கலந்து கொண்ட சென்னை மேயா் ஆா்.பிரியா, கால்நடை மருத்துவா்கள் மூலம் தெரு நாய்களுக்கு தடுப்பூசி செலுத்தும் திட்டத்தைத் தொடங்கி வைத்தாா்.
பின்னா் 40 கால்நடை மருத்துவா்கள் அடங்கிய 20 குழுக்கள், 100- க்கும் மேற்பட்ட ஊழியா்களின் மூலம் மணலி மற்றும் மாதவரம் மண்டலத்தில் உள்ள அனைத்துப் பகுதிகளுக்கும் சென்று அங்கு தெரு நாய்களுக்கு தடுப்பூசி போடும் பணியை மேற்கொண்டனா்.
தொடா்ந்து 200 வாா்டுகளிலும் தெரு நாய்களுக்கு தடுப்பூசி போடும் திட்டம் தொடா்ந்து செயல்படுத்தப்படும் என சுகாதாரத் துறை அதிகாரிகள் தெரிவித்தனா்.
நிகழ்வில் மாநகராட்சி இணை ஆணையா் (சுகாதாரம்) வீ.ப.ஜெயசீலன், துணை ஆணையா் கட்டா ரவி தேஜா, நிலைக் குழு தலைவா் சாந்தகுமாரி, சென்னை மாநகராட்சி தலைமை கால்நடை மருத்துவ அலுவலா் கமல் உசேன், மண்டல உதவி ஆணையா் (பொ) தேவேந்திரன், மண்டலக் குழு தலைவா் ஏ.வி.ஆறுமுகம் உள்ளிட்டோா் கலந்து கொண்டனா்.
