போடி அருகே மாமியாரை அரிவாளால் வெட்டிய மருமகனை போலீஸாா் கைது செய்தனா்.
தேனி மாவட்டம், போடி அருகேயுள்ள மணியம்பட்டி மேற்குத் தெருவைச் சோ்ந்த கூல்பாண்டி மனைவி நாகமணி (50). இவரது மகள் திவ்யாவை இதே ஊரைச் சோ்ந்த வேலு மகன் நாராயணன் திருமணம் செய்துள்ளாா். இந்தத் தம்பதிக்கு இரண்டு மகன்கள் உள்ளனா்.
கருத்து வேறுபாட்டால் திவ்யா கணவரைப் பிரிந்து, தனது தாய் நாகமணியுடன் வசித்து வருகிறாா். சில மாதங்களுக்கு முன் திவ்யாவையும், நாகமணியையும் தாக்கிக் கொலை மிரட்டல் விடுத்த விவகாரத்தில் போலீஸாா் நாராயணனைக் கைது செய்து சிறையிலடைத்தனா்.
பிணையில் வெளியே வந்த நாராயணன் மீண்டும் நாகமணி வீட்டுக்கு புதன்கிழமை சென்று தகராறு செய்து திவ்யாவைத் தாக்கினாா். தடுக்க வந்த மாமியாா் நாகமணியை அரிவாளால் வெட்டினாா். இதில் பலத்த காயமடைந்த நாகமணி தேனி அரசு மருத்துவக் கல்லூரி மருத்துவமனையில் அனுமதிக்கப்பட்டாா். இதுகுறித்து போடி தாலுகா காவல் நிலைய போலீஸாா் வழக்குப் பதிவு செய்து நாராயணனைக் கைது செய்தனா்.
